Շվեդական IKEA-ն չի պատրաստվում վաճառել իր բիզնեսը Ռուսաստանում, հայտնում է ՏԱՍՍ-ը՝ վկայակոչելով ընկերությանը մոտ կանգնած աղբյուրին։ Ընկերությունն ակնկալում է երկու տարվա ընթացքում կրկին խանութներ ու պահեստներ բացել Ռուսաստանում։
«IKEA-ն չի պատրաստվում որեւէ մեկին վաճառել իր բիզնեսը Ռուսաստանում, ինչը երբեք չի արել նաեւ այլ երկրներում: Ռիթեյլերը նախատեսում է ինքնուրույն վերադառնալ Ռուսաստանի Դաշնություն մեկ-երկու տարվա ընթացքում՝ տնտեսական իրավիճակի փոփոխությունից եւ պատժամիջոցների ճնշման թուլացումից հետո։ Խանութները, այսպես կոչված կապույտ արկղները, փակ կլինեն մինչեւ IKEA-ի վերադարձը, եւ հնարավոր է վարձով տրվեն հաջորդ տարվանից»,- ասել է գործակալության զրուցակիցը։ Նա նաեւ մանրամասնել է, որ շվեդական ընկերությունում իրենց աշխատանքը կշարունակի մոտ 700 հոգի։ IKEA-ն աշխատակիցներին տրամադրել է աշխատանքի այլընտրանքային տարբերակներ կամ նվազագույն աշխատավարձ՝ թիմ վերադառնալու հեռանկարով:
Այնուամենայնիվ, Շվեդիայի ճնշման պատճառով, ըստ աղբյուրի, ընկերությունը դեռեւս կվաճառի Ռուսաստանում որոշ գործարաններ։ Սակայն գործարքը կկատարվի այն պայմանով, որ ապագայում այդ գործարանները կարտադրեն կահույք եւ այլ ապրանքներ իրենց պատվերի համար։ Ռուսաստանում IKEA-ի երեք գործարան կա՝ Մոսկվայի, Կիրովի եւ Նովգորոդի մարզերում։
Ուկրաինայում Ռուսաստանի ռազմական գործողության մեկնարկից հետո IKEA-ն հայտարարել է Ռուսաստանում եւ Բելառուսում բոլոր խանութների գործունեության դադարեցման մասին, իսկ հունիսի 15-ին մանրածախ վաճառողը հայտարարել է երկրում իր ներկայության կրճատման մասին։ Ավելի ուշ մանրածախ առցանց խանութում սկսվել է մնացած ապրանքների վերջնական վաճառքը։ Սակայն տեխնիկական խնդիրների պատճառով պատվերը դադարեցվել է մինչեւ օգոստոս։ Օգոստոսի կեսին IKEA-ն հայտարարել էր ռուս «դստեր» լուծարման մասին՝ իր միակ մասնակցի՝ Ingka Holding Europe B.V.-ի որոշմամբ, գրում է «Կոմերսանտը»։
