Apple-ը նոր iPhone 14-ի գործառույթների մասին ակնարկներ է թաքցրել սեպտեմբերին նախատեսված շնորհանդեսի հրավերի մեջ, հայտարարել է 9to5Mac պորտալը:
Նախօրեին Apple-ը պաշտոնապես հաստատել էր իր աշնանային միջոցառման ամսաթիվը՝ լրագրողներին առցանց միջոցառման հրավերներ ուղարկելով: Հրավերներն արված են «տիեզերական» ոճով՝ Apple-ի տարբերանշանը կազմված է աստղերից։ Ըստ 9to5Mac-ի լրագրողների՝ դա կարող է ուղիղ ակնարկ լինել մի շարք գործառույթների, որոնք կհայտնվեն ընկերության սմարթֆոնների նոր շարքում։
Առաջին հերթին, խոսքը կարող է լինել արբանյակային կապի աջակցության մասին։ Այդ հատկության մասին առաջին անգամ խոսվել էր անցյալ տարվա շնորհանդեսի նախօրեին, սակայն iPhone 13-ն այդպես էլ այն չստացավ։ Չի բացառվում, որ այս տարի Apple-ը նոր շարքում արբանյակային կապ կավելացնի։
Բացի այդ, «տիեզերքը» հրավերի մեջ կարող է ակնարկել տեսախցիկի նոր առանձնահատկության մասին, այն է՝ աստղալուսանկարչության: Այս գործարույթն արդեն հասանելի է շատ ֆլագմանային Android սմարթֆոններում, այդ ռեժիմը թույլ է տալիս աստղային երկնքի բարձրորակ լուսանկարներ անել ցածր լույսի ներքո: Այդ iPhone 14-ում կարող է օգնել 48 MP տեսախցիկի նոր մոդուլը։