Ֆինլանդիայի եւ Շվեդիայի պաշտպանական ուժերի հրամանատարներն առաջին անգամ հրավիրվել են ՆԱՏՕ-ի ռազմական կոմիտեի համաժողովին, որին մասնակցում են դաշինքի բոլոր երկրների զինված ուժերի հրամանատարները, հինգշաբթի օրը «Ինտերֆաքս»-ին հայտնել են Էստոնիայի պաշտպանության ուժերի գլխավոր շտաբից։
Համաժողովը տեղի կունենա Տալլինում՝ սեպտեմբերի 16-18-ը, հյուրընկալող կողմը կլինի Էստոնիայի պաշտպանության ուժերի հրամանատար, գեներալ-լեյտենանտ Մարտին Հերեմը։ Համաժողովում կնախագահի ՆԱՏՕ-ի ռազմական կոմիտեի նախագահ, ծովակալ Ռոբ Բաուերը։
Հանդիպման մասնակիցները կքննարկեն դաշինքի ռազմավարական խնդիրները, զսպման ու պաշտպանության վերաբերյալ Մադրիդում ՆԱՏՕ-ի գագաթաժողովի որոշումների կատարումը։ Նրանք նաեւ կքննարկեն ՆԱՏՕ-ի ընթացիկ գործողությունները, առաքելությունները եւ գործունեությունը, ներառյալ ՆԱՏՕ-ի առաքելությունները Իրաքում (NMI) եւ Կոսովոյում (KFOR):
Ռազմական կոմիտեն հավաքվում է ՆԱՏՕ-ի գործողությունները, առաքելությունները եւ գործունեությունը քննարկելու եւ Հյուսիսատլանտյան խորհրդին կոնսենսուսի վրա հիմնված ռազմական խորհրդատվություն տրամադրելու համար, թե ՆԱՏՕ-ն ինչպես կարող է ավելի լավ լուծել անվտանգության գլոբալ մարտահրավերները:
Ֆինլանդիան եւ Շվեդիան պատրաստվում են անդամակցել ՆԱՏՕ-ին։
