Ավստրիայի կանցլեր Կառլ Նեհամերը աջակցում է էլեկտրաէներգիայի գների բարձրացման համար Եվրամիության մշակած սահմանաչափին, ասվում է կիրակի օրը նրա գրասենյակի կողմից տարածված հայտարարության մեջ, հաղորդում է Reuters լրատվական գործակալությունը:
Ավստրիայի պահպանողական կառավարությունն ի սկզբանե թերահավատորեն էր վերաբերվում էլեկտրաէներգիայի համար գներ սահմանելու գաղափարին, սակայն վերջերս այդ քաղաքականությունը փոխվել է, քանի որ գները շարունակում են աճել՝ գազի թանկացող գներին համահունչ:
«Մենք պետք է վերջապես դադարեցնենք այն խելագարությունը, որը տեղի է ունենում էներգետիկ շուկաներում։ Եվ դա կարող է տեղի ունենալ միայն եվրոպական լուծման միջոցով»,- ասել է Նեհամերը՝ հավելելով, որ ինքը կձգտի համոզել դաշինքի կողմնակիցներին։
«Վերջապես ինչ-որ բան պետք է տեղի ունենա: Այս շուկան ներկայիս տեսքով ինքն իրեն չի կարգավորվի։ Կոչ եմ անում ԵՄ անդամ բոլոր 27 երկրներին միավորվել եւ անհապաղ դադարեցնել գնային այս պայթյունը»,- ասել է նա։
Ավստրիան մեծապես կախված է ռուսական գազից, հատկապես արդյունաբերության եւ ջեռուցման ոլորտում` մինչեւ ուկրաինական հակամարտությունը՝ իր մատակարարումների մոտ 80 տոկոսը ստանալով Ռուսաստանից: Այնուամենայնիվ, էլեկտրաէներգիայի մեծ մասն արտադրվում է վերականգնվող աղբյուրներից, եւ ավստրիական հասարակության շրջանում աճում է թյուրըմբռնումը շուկայական համակարգի վերաբերյալ, որտեղ գազի եւ էլեկտրաէներգիայի գները սերտորեն կապված են:
Ավստրիայի կանցլերը նշել է, որ էլեկտրաէներգիայի շուկայական գինը պետք է իջնի եւ անջատվի գազի գնից՝ այն մոտեցնելու իրական արտադրության ծախսերին։
Չեխիան, որը նախագահում է ԵՄ-ում, կառաջարկի որքան հնարավոր է շուտ հրավիրել ԵՄ Էներգետիկական խորհրդի արտահերթ նիստ՝ լուծելու էներգակիրների գների աճի խնդիրը, ուրբաթ օրը հայտարարել են Չեխիայի կառավարության պաշտոնյաները:
Կանցլերի գրասենյակի տարածած հայտարարության մեջ ասվում է, որ առաջ է մղվելու կայուն մոդել, որը կարող է արագ կիրառվել: Նշվում է նաեւ, որ նա այդ հարցը քննարկել է իր չեխ եւ գերմանացի գործընկերների հետ։
