Համակարգչային արտաքին սարքերի համաշխարհային արտադրող Logitech-ը հեռանում է ռուսական շուկայից «անկայուն իրավիճակի» պատճառով, սակայն հույս ունի վերադառնալ, երբ հարմար պայմաններ ստեղծվեն, «Ինտերֆաքս»-ին հայտնել են ընկերության մամուլի ծառայությունից։
«Այս տարվա սկզբին Ռուսաստան մատակարարումների դադարեցումից հետո մենք շարունակել ենք ուշադիր հետեւել իրավիճակին։ Ցավոք, հանգամանքները թույլ չեն տալիս նախկինի պես շարունակել բիզնեսը։ Մենք այս ամբողջ ընթացքում աջակցել ենք մեր աշխատակիցներին, սակայն իրավիճակի անկայունության պատճառով սկսել ենք Ռուսաստանում մնացած բիզնեսի դադարեցման գործընթացը։ Տարածաշրջանում երկար տարիներ աշխատելուց հետո մենք հուսով ենք, որ մի օր կվերադառնանք, եթե լինեն համապատասխան պայմաններ»,- «Ինտերֆաքս»-ի հարցին պատասխանել է ընկերության ներկայացուցիչ Բեն Սթարքին:
Ավելի վաղ Cnews պորտալը հայտնել էր Ռուսաստանի Դաշնությունում Logitech-ի բիզնեսի փակման մասին՝ վկայակոչելով ընկերության գործընկերներին։ Երկրում աշխատողների աշխատանքի վերջին օր նշվել է 2022 թվականի օգոստոսի 31-ը։
Ավելի վաղ՝ ապրիլին, ընկերությունը դադարեցրել էր իր արտադրանքի մատակարարումները Ռուսաստան՝ Ուկրաինայում ռուսական հատուկ գործողության պատճառով։
Logitech International S.A.-ն շվեյցարական-ամերիկյան ընկերություն է, որի գլխամասային գրասենյակը գտնվում է Լոզանում (Շվեյցարիա) եւ Նյուարքում (Կալիֆոռնիա, ԱՄՆ): Համակարգչային արտաքին սարքերի (այսինքն՝ համակարգիչների համար տեղեկատվության մուտք-ելքի սարքեր՝ մկնիկներ, ստեղնաշարներ, վեբ-տեսախցիկներ, ականջակալներ եւ այլն) եւ այլ ապրանքների առաջատար արտադրողներից է։