USB Promoter Group-ը ներկայացրել է USB ձեւաչափի նոր սերունդը, հայտնում է The Verge-ը:

Ընկերության զարգացման եւ տարածման համար պատասխանատու մասնագետները նշել են, որ USB 4 2.0-ը մինչեւ 80 գիգաբիթ/վրկ թողունակություն կապահովի։ Դա երկու անգամ ավելի է, քան ներկայիս USB 4 ձեւաչափը: Ինժեներները հայտնել են, որ արդիականացումը հնարավոր է դարձել թարմացված ֆիզիկական շերտի ճարտարապետության եւ տվյալների փոխանցման բարելավված արձանագրության շնորհիվ:

USB Promoter Group-ի ներկայացուցիչները հայտնել են, որ տվյալների փոխանցման ավելացված արագությունը կաջակցվի նաեւ USB-C մալուխներում, որոնք այս պահին առավելագույնը 40 գիգաբիթ/վրկ արագություն են ապահովում: Նոր ձեւաչափը հետընթաց համատեղելի է USB4 1.0, USB 3.2, USB 2.0 եւ Thunderbolt 3-ի հետ:

Նոր տեխնոլոգիայի մանրամասները կբացահայտվեն USB DevDays ծրագրավորողների համաժողովին, որը տեղի կունենա նոյեմբերի 1-ին եւ 2-ին Սիեթլում եւ նոյեմբերի 15-ին եւ 16-ին Սեուլում: Թե երբ նոր ստանդարտը կընդունվի, դեռ հայտնի չէ։