Շվեդիայի և Ֆինլանդիայի՝ Հյուսիսատլանտյան դաշինքին անդամակցելու հարցում Թուրքիայի հետ տարաձայնությունները դեռևս պահպանվում են։ Այս մասին հայտարարել է ՆԱՏՕ-ի գլխավոր քարտուղար Յենս Սթոլթենբերգը։
Նա ընդգծեց, որ նախկինում վիճելի հարցերը միշտ էլ հաջողվել է լուծել. «Մենք միշտ կարողացել ենք հաղթահարել այդ տարաձայնությունները, միասին քայլեր ձեռնարկել և համատեղ իրականացնել դրանք»։
Սթոլթենբերգը նաև նշել է, որ Շվեդիայի և Ֆինլանդիայի՝ ՆԱՏՕ-ին անդամակցելու գործընթացն ամենաարագն է պատմության մեջ. «Մինչ այժմ ՆԱՏՕ-ի 30 երկրներից 24-ը, այդ թվում՝ ԱՄՆ-ն, արդեն վավերացրել են անդամակցության արձանագրությունը։ Բայց կարևոր է նաև, որ մենք լրջորեն վերաբերվենք ՆԱՏՕ-ի բոլոր երկրների անվտանգության ոլորտում ունեցած մտահոգություններին, քանի որ ՆԱՏՕ-ի ոչ մի երկիր այդքան ահաբեկչությունների չի բախվել, որքան Թուրքիան»:
Հիշեցնենք, որ 2022 թվականի հունիսին Շվեդիան, Ֆինլանդիան և Թուրքիան հուշագիր են ստորագրել, որը թույլ է տալիս Շվեդիայի և Ֆինլանդիայի՝ ՆԱՏՕ-ին անդամակցելու գործընթաց սկսել: