ԻԻՀ նախագահի մամուլի ծառայության հաղորդմամբ՝ Իրանի նախագահ Էբրահիմ Ռայիսին հեռախոսազրույց է ունեցել ՀՀ վարչապետ Նիկոլ Փաշինյանի հետ, որի ընթացքում հայտնել է Հարավային Կովկասում նոր պատերազմի անթույլատրելիության մասին։
«Կովկասի տարածաշրջանը, ցավոք, ծանր իրավիճակում է։ Անհրաժեշտ է վերադարձնել խաղաղությունը»,-ասել է նա։
Նա նաեւ նշել է տարածաշրջանում Իսրայելի ազդեցությունը, որը, նրա խոսքով, սպառնալիք է ողջ տարածաշրջանի համար։ Նա հավելել է, որ Իրանն ուշադիր հետեւում է տարածաշրջանում իրադարձությունների զարգացմանը, եւ որ տարածաշրջանը չպետք է նոր պատերազմ թույլ տա։
«Հայաստանի եւ Իրանի պատմական սահմանները տարածաշրջանի բարգավաճման, անվտանգության հիմք են, եւ Թեհրանը վճռական է՝ շարունակելու հանուն տարածաշրջանի բարգավաճման բոլոր ոլորտներում համագործակցությունը»,-ընդգծել է Ռայիսին։