Եվրոպայի գազի պահեստարանները կարող են դատարկվել հաջորդ տարվա փետրվարի սկզբին, գրել է La Vanguardia իսպանական թերթը։

«160 գազի պահեստարանները, որոնք բաշխված են 18 երկրներում եւ ներկայում լցված են մոտ 83 տոկոսով, բավական են՝ փակելու համար  ԵՄ անդամ երկրների տարեկան սպառման միայն 21 տոկոսը»,- նշվել է հրապարակման մեջ։

Հոդվածում նշվել է, որ եվրոպացի քաղաքական գործիչների խնդիրն այն է, որպեսզի գազի այս պաշարներով դիմանան ձմռանը։

«Եթե թե՛ միությունը, թե՛ հարեւան երկրները, որոնց հետ նա մատակարարումների ընդհանուր ցանց ունի, ինչպիսին են Մեծ Բրիտանիան, Շվեյցարիան եւ Բալկանները, չկարողանան կրճատել գազի պահանջարկն առնվազն 10 տոկոսով, 2023թ. փետրվարի սկզբին Եվրոպայի պահեստարանները կարող են դատարկվել»,- տեղեկացրել են հոդվածագիրները՝ հղում կատարելով վերլուծական տվյալներին։

Փորձագետների կանխատեսումներով՝ ամենալավատեսական սցենարը կաշխատի գազի սպառումը 15 տոկոսով կրճատելու դեպքում, բայց վստահություն, որ կարելի է հասնել դրան, մասնագետները չունեն։