Կառավարությունն իր այսօրվա՝ սեպտեմբերի 22-ի նիստում որոշեց գերակա ոլորտում իրականացվող ներդրումային ծրագրի շրջանակներում մաքսատուրքից ազատել «ԷՄ ԷՌ ԻՆՎԵՍՏ» սահմանափակ պատասխանատվությամբ ընկերությանը:
Որոշման հիմնավորման մեջ նշվում է, որ «ԷՄ ԷՌ ԻՆՎԵՍՏ» ընկերության կողմից ներմուծվող ապրանքներով նախատեսվում է հիմնել խնձորի և կեռասի ինտենսիվ այգիներ ՀՀ Կոտայքի մարզում։ Ընկերությունը հիմնադրվել է 2018 թվականին։
Ծրագրի շրջանակում նախատեսվում է իրականացնել 3․2 մլրդ դրամի կապիտալ ներդրում՝ ցանկում ներկայացված ապրանքների ձեռքբերման և այլ աշխատանքների իրականացման համար։ Ներկայումս առկա է 45 աշխատատեղ 204 հազար դրամ միջին ամսական աշխատավարձով։ Ներդրումային ծրագրի շրջանակներում նոր աշխատատեղերի ստեղծում չի նախատեսվում։
Արտոնություն ստանալու համար ներկայացված ապրանքների արժեքը կազմում է 1․14 մլրդ դրամ: Մաքսատուրքից ազատման արտոնությունը գնահատվում է 70.2 մլն դրամ:
