Իռլանդիայի բանկը (Bank of Ireland Group) վճարովի արձակուրդ է առաջարկում դաշտանադադարի միջով անցնող կին աշխատողներին՝ միանալով այն ընկերությունների աճող ցանկին, որոնք փորձում են թույլ չտալ, որ կանայք հեռանան աշխատաշուկայից:
Բանկի աշխատակիցները կարող են տարեկան մինչեւ 10 ազատ օր վերցնել, եթե դաշտանադադարի հետ կապված ֆիզիկական կամ հոգեբանական ախտանիշներ ունենան, հայտնել է բանկը:
Բանկը, որտեղ աշխատում է մոտ 9800 մարդ ամբողջ աշխարհում, նաեւ մենեջերներին կսովորեցնի, թե ինչպես աջակցել գործընկերներին դաշտանադադարի ժամանակ: Նրա աշխատակիցների մեծ մասը գտնվում է Իռլանդիայում եւ Մեծ Բրիտանիայում:
«Մենք ցանկանում ենք օգնել մեր գործընկերներին կյանքի բոլոր փուլերում, ներառյալ՝ դաշտանադադարը»,- ասել է Մարդկային ռեսուրսների բաժնի ղեկավար Ջոան Հելին: «Սա կօգնի մեզ շարունակել ստեղծել աշխատանքային միջավայր, որտեղ բոլորին կվերաբերվեն արդար, արժանապատվորեն եւ հարգանքով»,- հավելել է նա:
