Ռուսաստանի Դաշնության Անվտանգության խորհրդի քարտուղար Նիկոլայ Պատրուշեւը Մոսկվայում երկկողմ հանդիպումներ է ունեցել Հայաստանի եւ Ադրբեջանի գործընկերների հետ, որոնց ընթացքում քննարկվել են տարածաշրջանային անվտանգության հարցեր։

ՌԴ Անվտանգության խորհուրդը հայտնում է, որ ՀՀ Անվտանգության խորհրդի քարտուղար Արմեն Գրիգորյանի հետ հանդիպմանը քննարկվել են ազգային եւ տարածաշրջանային անվտանգության հարցերի լայն շրջանակում ռուս-հայկական համագործակցության հարցեր, ինչպես նաեւ ՀԱՊԿ շրջանակներում փոխգործակցությունը։

ԱՀ Անվտանգության խորհրդի քարտուղար Ռամիլ Ուսուբովի հետ քննարկվել են տարածաշրջանում անվտանգության մի շարք հարցեր, ինչպես նաեւ տեղեկատվական անվտանգության եւ ահաբեկչության դեմ պայքարի ոլորտում ռուս-ադրբեջանական համագործակցության հետագա միջոցառումները։ Բացի այդ, զրուցակիցները ստորագրել են երկու երկրների անվտանգության խորհուրդների միջոցով 2023-2024 թվականների համագործակցության ծրագիր՝ ընդգծելով, որ այդ ծրագրի իրականացումը կծառայի Ռուսաստանի եւ Ադրբեջանի միջեւ դաշնակցային հարաբերությունների ամրապնդմանը։

Բանակցությունները տեղի են ունեցել Մոսկվայում ընթացող ԱՊՀ երկրների անվտանգության խորհուրդների քարտուղարների տասներորդ տարեկան հանդիպման շրջանակում։