Ուկրաինայում պատերազմի մեկնարկից ի վեր, ԱՄՆ-ը Կիեւին տրամադրել է ռազմական օգնության առյուծի բաժինը, ինչպես նաեւ հսկայական ֆինանսական եւ հումանիտար օգնություն: Նոյեմբերի 8-ին ԱՄՆ միջանկյալ ընտրությունների հետ մեկտեղ եւ՛ նախագահ Ջո Բայդենի վարչակազմը, եւ՛ Ուկրաինայի նախագահ Վոլոդիմիր Զելենսկին վախենում են, որ Ուկրաինային աջակցության այդ ուղիները զգալիորեն կկրճատվեն, գրում է Asia Times-ը։
«Ռուս-ուկրաինական հակամարտության տնտեսական հետեւանքները, ինչպիսիք են էներգակիրների թանկացումը, ազդել են ամերիկացի ընտրողների վրա, եւ վերջին հարցումները ցույց են տալիս, որ պատերազմին աջակցությունը նվազում է, հատկապես հանրապետականների շրջանում:
Թեեւ ԱՄՆ տնտեսությունը համեմատաբար լավ վիճակում է, համեմատած մնացած աշխարհի մեծ մասի հետ, հանրապետականները ամիսներ շարունակ օգտագործում են ներքին տնտեսական խնդիրները՝ խարխլելու Բայդենի եւ դեմոկրատների իշխանությունը:
Եվ մինչ շատ ազդեցիկ հանրապետականները, ինչպիսին է սենատոր Լինդսի Գրեհեմը, շարունակում են խստորեն աջակցել Ուկրաինային, մյուսները, որոնք կապված են «Թեյ Փարթի» շարժման եւ ԱՄՆ նախկին նախագահ Դոնալդ Թրամփի հետ, ձեւավորում են Հանրապետական կուսակցության ավելի ու ավելի աղմկոտ «մեկուսացած թեւը»:
Պոպուլիստական խմբի ազդեցությունն արտահայտվել է Սենատի փոքրամասնության առաջնորդ Միթչ Մաքքոնելի եւ Ներկայացուցիչների պալատի փոքրամասնության առաջնորդ Քեւին Մաքքարթիի միջեւ աճող պառակտմամբ:
Մայիսին Ներկայացուցիչների պալատի 57 հանրապետական անդամներ դեմ են քվեարկել Ուկրաինային 40 միլիարդ դոլարի օգնություն նախատեսող փաթեթին, իսկ հոկտեմբերի կեսերին Մաքքարթին նախազգուշացրել է, որ ԱՄՆ-ը «չի պատրաստվում Ուկրաինային քարտ-բլանշ տալ»: Եթե նախընտրական հարցումները, որոնք կանխատեսում են Ներկայացուցիչների պալատում հանրապետականների հաղթանակը, ճիշտ են, ապա Ուկրաինային օգնության ապագա փաթեթները, ամենայն հավանականությամբ, ավելի մեծ դիմադրության կհանդիպեն Կոնգրեսում:
Հյուսիսատլանտյան դաշինքին եւ Ուկրաինային աջակցությունը Թրամփի հանրապետական կողմնակիցների շրջանում ավանդաբար ցածր է եղել: Թրամփը, իր 2016 թվականի նախագահական արշավի եւ նախագահության ողջ ընթացքում, ծաղրել է ՆԱՏՕ-ին, եւ 2019 թվականի հուլիսին նրա հեռախոսազրույցը Զելենսկու հետ հանգեցրել է նրան իմփիչմենթի ենթարկելու առաջին պաշտոնական փորձերին:
Ցավոք, Կիեւի համար, ըստ Pew Research Center-ի սեպտեմբերյան հարցման, Ուկրաինայի ժողովրդավարական աջակցությունը նույնպես նվազել է, քանի որ աճել են տնտեսության եւ այլ խնդիրների հետ կապված մտահոգությունները:
Հոկտեմբերին Pew Research Center-ի մեկ այլ հարցում ցույց է տվել, որ տնտեսությունը գլխավոր խնդիր է միջանկյալ ընտրությունների գնացող քաղաքացիների համար: Չդադարող գնաճի վերաբերյալ Բայդենի բացատրությունը՝ «Պուտինի կողմից բենզինի գնի բարձրացումը», որոշ ընտրողների մտքում միայն ամրապնդել է այն կարծիքը, որ Մոսկվայի դեմ ԱՄՆ պատժամիջոցները եւ Կիեւին աջակցությունը մասամբ նրանց տնտեսական խնդիրների համար պատճառ են հանդիսանում:
Իսկ հոկտեմբերի 24-ին ԱՄՆ Ներկայացուցիչների պալատի առաջադեմ խմբի 30 անդամներ նամակ են գրել նախագահ Բայդենին՝ կոչ անելով ուղիղ բանակցություններ վարել Ռուսաստանի հետ եւ դադարեցնել պատերազմը: Թեեւ նամակը հետ է կանչվել հաջորդ օրը, այն եւս մեկ անգամ ցույց է տալիս որ Ուկրաինան չի վայելում ամերիկացի ձախերից աջակցությունը:
Կիլի Համաշխարհային տնտեսության ինստիտուտի «Ուկրաինայի աջակցության հետագծող» խմբի ղեկավար Տրեբսը նշել է, որ «ԱՄՆ-ն ներկայումս տրամադրում է գրեթե երկու անգամ ավելի շատ ֆինանսավորում, քան ԵՄ բոլոր երկրներն ու հաստատությունները միասին վերցրած»:
Մեծ Բրիտանիան գլխավորել է Եվրոպայի հիմնական ջանքերը՝ պաշտպանելու Ուկրաինան եւ պատրաստվում է այս տարի իր հողում վարժեցնել մինչեւ 10 հազար ուկրաինացի զինվոր: Սակայն Մեծ Բրիտանիան քաղաքական ապակայունացման շեմին է կագնած՝ սեպտեմբերին թագուհի Եղիսաբեթ 2-րդի մահից եւ երկու վարչապետների հրաժարականից հետո: Այս զարգացումները խաթարել են բրիտանական կառավարության կարողությունը՝ ձեւավորելու համահունչ արտաքին քաղաքականություն եւ ընդլայնելու իր աջակցությունն Ուկրաինային։
ԵՄ-ն Ուկրաինային միլիարդավոր եվրոյի ֆինանսական օգնություն է ուղարկել հակամարտության սկզբից, սակայն շատ ավելի քիչ՝ մարդասիրական եւ ռազմական օգնություն: Օգնությունը Ուկրաինայի ամենակարեւոր մատակարարներից՝ Ֆրանսիայից, Գերմանիայից, Իսպանիայից, Իտալիայից եւ Լեհաստանից, զգալիորեն նվազել է ապրիլի վերջից:
ԵՄ արտաքին քաղաքականության պատասխանատու Ժոսեպ Բորելը նախազգուշացրել է, որ անդամ պետությունների զենքի պաշարները «մեծապես սպառվել են» Ուկրաինային ամիսներ շարունակ զենք տրամադրելուց հետո՝ ամրապնդելով ԵՄ-ի՝ երկարաժամկետ սպառազինությունների մատակարարումները ապահովելու անկարողության ընկալումները: Օգնությւոն տրամադրելու հնարավորությունը կարող է վտանգվել նաեւ էներգակիրների գնաճի հետեւանքով:
Ինչպես ԱՄՆ-ում, եվրոպական քաղաքական աջ թեւի մեծ մասը արդեն շատ ավելի քիչ են շահագրգռված Ուկրաինային աջակցելու հարցում, քան քաղաքական հիմնական հոսքը:
Քանի որ հաջորդ շաբաթ կայանալիք ԱՄՆ միջանկյալ ընտրություններում Կոնգրեսի նորընտիր եւ վերընտրված ներկայացուցիչները պաշտոնը ստանձնելու են մինչեւ հունվար, Բայդենի վարչակազմը, ըստ երեւույթին, մտադիր է օգտագործել այս պատուհանը՝ Կիեւին իր աջակցությունն ուժեղացնելու համար: Օրենսդիրները սկսել են Ուկրաինային 50 միլիարդ դոլարի օգնության փաթեթի շուրջ քննարկումները, որոնք նախատեսվում է ավարտել մինչեւ հունվար»:
