Դահվայում՝ Հյուիսային Բատինայում Օմանի ժառանգության եւ տուրիզմի նախարարության հովանու ներքո աշխատող հնագետների միջազգային խումբը մ․թ․ա 3-րդ հազարյակի նախապատմական գերեզմանում հայտնաբերել է արծաթյա զարդերի եզակի հավաքածու։
Հավաքածուում ներառված են ուլունքներով մանյակի մասեր եւ մի քանի մատանիներ։ Հետաքրքիր է, որ արծաթե մատանիներից մեկի վրա հնդկական բիզոնի պատկերով կնիք է, որը Ինդոսի հովիտի (կամ Հարապպա )մշակույթի խորհրդանիշն է։ Սա վկայում է այն մասին, որ վաճառականները զբաղվել են միջտարածաշրջանային առեւտրով։
Թեեւ այս պատկերը բավականին հաճախ է հանդիպում կլոր քարե կնիքների վրա, որոնք կապված են Ինդոսի քաղաքակրթության հետ Իրանում, Բահրեյնում, Միջագետքում եւ Օմանում, հայտնաբերվածը բավականին արտասովոր է։
Եթե սովորաբար նման պատկեր հայտնաբերվում էր տեղական քարից պատրաստված կնիքների վրա, ապա այս դեպքում այն մետաղյա մատանու վրա է։
Նման հայտնագործությունը, ըստ գիտնականների, հաստատում է, որ բրոնզի դարի մարդիկ շատ ավելի հնարամիտ եւ տեխնիկապես զարգացած են եղել, քան նախկինում համարվում էր:
Կա եւս մեկ գործոն, որն ավելի ինտրիգային է դարձնում այս գտածոն։ Դա այն է, որ հայտնաբերված զարդերը պատրաստված են արծաթից, որն, ամենայն հավանականությամբ, բերվել է Անատոլիայից (Թուրքիա)։
