Կարելի էր նշել բազմաթիվ պատճառներ, թե ինչու ՀԱՊԿ անդամ երկրների ղեկավարների գագաթաժողովը չպետք է անցկացվեր Երեւանում։ Այնուամենայնիվ, այն տեղի կունենա հենց Երեւանում։ Այս մասին NEWS.am-ի հետ զրույցում ասաց քաղաքական վերլուծաբան, Եվրասիական փորձագիտական ակումբի համակարգող Արամ Սաֆարյանը։
Նա նշեց, որ Ռուսաստանի եւ Ղազախստանի ղեկավարներն արդեն հաստատել են իրենց մասնակցությունը։ Սաֆարյանը հույս հայտնեց, որ մյուսներն էլ կհաստատեն։
«Ինչ վերաբերում է Վլադիմիր Պուտինի այցին։ Ես կարծում եմ, որ մեր ժողովրդին այսօր ամենից շատ հուզում են ղարաբաղյան հակամարտության կարգավորման հեռանկարները, ինչպես նաեւ Հայաստանի եւ Ադրբեջանի միջեւ հաշտությա գործընթացը։ Ռուսաստանի նախագահ Վլադիմիր Պուտինը ստանձնել է միջնորդի դերը։ Մենք բոլորս շատ լավ հասկանում ենք, որ աշխարհաքաղաքական ուժերի միջեւ որոշակի մրցակցություն է առաջացել։ Իհարկե, կա նաեւ գաղափարների միասնություն։ Այսօր կան նաեւ ընդհանուր սկզբունքներ, որոնք ընդունելի եւ հասկանալի են բոլորի համար։ Միջազգային հանրությունն ակնկալում է, որ Երեւանի եւ Բաքվի միջեւ խաղաղության պայմանագրի կազմման ուղղությամբ ընթացող բանակցային գործընթացում հաշվի կառնվեն հենց այդ սկզբունքները»,-նշեց Սաֆարյանը։
Նա հավելեց, որ Ռուսաստանի, ԱՄՆ-ի եւ ԵՄ-ի միջեւ այսօր բավական լուրջ մրցակցություն է առաջացել, որի նպատակն է պահպանել եւ ընդլայնել իր ազդեցությունը: «Անձամբ ես չեմ կարծում, որ դա վատ է։ Ես կարծում եմ, որ դա բնական է, քանի որ դա վկայում է ուժային կենտրոնների՝ Հարավային Կովկասի նկատմամբ իրական շահագրգռվածության մասին։ Հայկական դիվանագիտությունն ու իշխանությունը պետք է ճիշտ կողմնորոշվեն նման բարդ աշխարհաքաղաքական իրավիճակում։ Նրանք պետք է ճիշտ տարբերակեն առաջնայինը երկրորդայինից»,-ասաց քաղաքագետը։
Սաֆարյանի գնահատմամբ՝ ԵԱՀԿ Մինսկի խմբի համանախագահող բոլոր երկրներից հենց Ռուսաստանն է ունեցել եւ նախկինի պես ունի ազդեցության ամենաարդյունավետ լծակները։