Հնդկաստանի ոստիկանությունը ձերբակալել է աղջկա ծնողներին նրա սպանության կասկածանքով, հայտնում է BBC-ն։

Պլաստիկով փաթաթված աղջկա մարմինը ուրբաթ օրը հայտնաբերվել կարմիր ճամպրուկում՝ Ուտար Պրադեշ նահանգի հյուսիսում գտնվող Մաթուրա քաղաքի մոտ։

Մեղադրյալները՝ նրա հայրը՝ Նիտեշ Կումար Յադավը, եւ մայրը՝ Բրաջբալան, դեռեւս որեւէ հայտարարություն չեն արել։ Ոստիկանությունը հայտնել է որ գործը քննվում է որպես «պատվի համար սպանություն»:

Նման սպանությունների զոհերը հիմնականում երիտասարդ տղամարդիկ ու կանայք են, որոնք իրենց ընտանիքների կամքին հակառակ սիրահարվում կամ ամուսնանում են ոչ իրենց կաստայի անդամի հետ:

Ոստիկանության տվյալներով, տուժածը՝ Աայուշի Չաուդհարին, իր ընտանիքի հետ ապրում էր Դելիում եւ սովորում այնտեղի մասնավոր քոլեջում:

Նոյեմբերի 17-ին 22-ամյա աղջկա հայրը սպանել է նրան այլ կաստայի տղամարդու հետ նրա ամուսնության շուրջ վեճից հետո։ Ծնողները դիակը դրել են ճամպրուկի մեջ եւ գիշերը թողել Յամունա արագընթաց մայրուղու մոտ։

Դիակի հայտնաբերումից մեկ օր անց կատարվել է դիահերձում, որի ընթացքում հայտնաբերվել են վնասվածքի հետքեր աղջկա գլխին, դեմքին եւ մարմնի այլ մասերին, հայտնել են ոստիկանությունից՝ հավելելով, որ նա մահացել է այն բանից հետո, երբ «կրծքավանդակին երկու կրակոց է ստացել»։

Նրանք առգրավել են հոր լիցենզավորված հրացանն ու ավտոմեքենան, որը ենթադրաբար օգտագործվել է հանցագործության մեջ։