Ռուսական նավթը Եվրոպա մղելու սպասվող կրկնակի կրճատման պատճառով Բելառուսը Ռուսաստանին խնդրել է 2023 թվականի հունվարի 1-ից «Դրուժբա» նավթամուղով մատակարարումների սակագինը 39 տոկոսով բարձրացնել։ Այս առաջարկի մասին հայտնել է «Տրանսնեֆտ»-ի պաշտոնական ներկայացուցիչ Իգոր Դեմինը, գրում է ՏԱՍՍ-ը։
Նա չի հստակեցրել, թե Ռուսաստանը ինչ պատասխան է նախատեսում տալ պայմաններն այդքան լրջորեն փոխելու ցանկությանը։ Սակայն ավելի վաղ Մոսկվան բացասաբար էր վերաբերվում վճարումների ավելացման Մինսկի ցանկությանը։
Այսպես, 2021 թվականին «Տրանսնեֆտ»-ի նախագահ Նիկոլայ Տոկարեւը նույնիսկ չի բացառել Բելառուսում դուստր ձեռնարկության փակումը: Ռուսական կողմը գտնում էր, որ հարկային բեռի հետագա ավելացումը կարող է նախադրյալներ ստեղծել «Արեւմուտք - Տրանսնեֆտեպրոդուկտ»-ի սնանկացման եւ ազգայնացման համար։
Ավելի վաղ «Դրուժբա» նավթատարի ուկրաինական ճյուղով մատակարարումների սակագների բարձրացման մասին հայտարարել էր «Ուկրտրանսնաֆտան»։ Դեմինը հաստատել է նամակի ստացումը, սակայն չի հրապարակել առաջարկվող պայմանները: Bloomberg-ը, որը ծանոթացել է նամակին, պնդում է, որ սակագինը կբարձրանա 18 տոկոսով՝ մինչեւ 13,6 եվրո։ Վերջին անգամ Ուկրաինան Եվրոպա նավթի մատակարարման սակագինը բարձրացրել է ապրիլի 1-ին։ Մինչ այդ այն 14 ամսվա համար կազմել է 8,6 եվրո՝ մեկ տոննայի համար։
Դեկտեմբերի 5-ից ուժի մեջ է մտնում ռուսական նավթի մատակարարման եվրոպական էմբարգոն, սակայն այն չի վերաբերում հումքին, որը մղվում է «Դրուժբա» խողովակաշարով։ Ինչի շուրջ ԵՄ ղեկավարությունը փոխզիջման է գնացել՝ հումքի այլընտրանքային մատակարարումներ ապահովելու մի շարք երկրների անպատրաստության պատճառով։