Մենք հաճախ ականատես ենք լինում դեպքերի, երբ որեւէ տեղում շինարարական փոս է ստեղծվում եւ տարիներով, նույնիսկ տասնամյակներով էդպես մնում է: Այս մասին, այսօր՝ դեկտեմբերի 1-ին, կառավարության նիստում հայտարարեց վարչապետ Նիկոլ Փաշինյանը:
«Հետո մենք էլ սովորում ենք դրան: Սա դիտվում է որպես նորմալ երեւույթ, ասում են՝ դե մարդ ա, կսարքի, էլի: Ոչ մեկ չի մտածում, որ դա նախ անհարգալից վերաբերմունք է հանրության նկատմամբ, անհարմարություններ է ստեղծում, խաթարում է միջավայրը: Էլ չեմ ասում, որ այդ ռեսուրսը կարող էր ավելի նպատակային ծառայել:
Հիմա մենք ասում ենք՝ շինթույլտվության ժամկետն ավարտվեց, դրանից սկսած այլ կարգի կարգավորումներ են գործելու, գույքային հարկեր պետք է վճարվեն եւ շինթույլտվությունը երկարացնելու համար ավելի բարձր տուրքեր պետք է վճարեն:
Շինարարությունն սկսվեց, պետք է այն ավարտվի, տենց չի կարող, որ քաղաքի կենտրոնում կամ ոչ կենտրոնում կամ մայրուղու վրա ցելոֆաններով կամ կիսաշինարարական, կամ շինարարական աղբի մեջ տարածքները հավերժ մնան: Դա պետք է բերի ֆինանսական հետեւանքների»,-հայտարարեց վարչապետը՝ հավելելով, որ հետագայում չի բացառվում, որ ավելի խիստ միջոցներ կիրառվեն:
«Եթե որեւէ մեկը հասցնի գիշերվա ընթացքում Հանրապետության հրապարակի կենտրոնում բուդկա դնի, հետո կարող է պարզվի, որ մենք պետք է տարիներով դատական պրոցեսներով անցնենք, որ այդ բուդկան հանենք:
Մենք դեպքեր ունենք, որ ինչ-որ մեկը Երեւանի զբոսայգիներում բերել մի ժանգոտ բուդկա է դրել 25 տարի առաջ ու մինչեւ հիմա մեր պետական մարմինները երեւի մի 300-400 կգ թուղթ են գրել այդ ապօրինի կառույցի վերաբերյալ;
Ես տպավորություն եմ ստանում, որ մեզ մոտ օրենսդրական կարգավորումները ոչ թե օրինականությունը, այլ ապօրինությունը պաշտպանելու համար են: Այդպես չի կարելի շարունակել»,-հայտարարեց Փաշինյանը:
Նշենք, որ այսօր կառավարությունը հավանություն տվեց օրինագծերի փաթեթին, ըստ որի եթե շինթույլտվության ժամկետն ավարտվում է եւ շենքը դեռ իկսավարտ է, սեփականատերը պետք է վճարի այնքան գույքահարկ, որքան կվճարեր, եթե շինարարությունն ավարտված լինել: Նաեւ նախատեսվում է 2-10 անգամ ավելացնել շինթույլտվության տուրքը:
