Այսօր Հայաստանի կողմից ճիշտ չէ ճանաչել Ղարաբաղի անկախությունը։ Այս մասին դեկտեմբերի 5-ին լրագրողների հետ զրույցում ասաց իշխող «Քաղաքացիական պայմանագիր» կուսակցության պատգամավոր Հովիկ Աղազարյանը։
Դա, նրա կարծիքով, գիտակցում է նաեւ ընդդիմությունը։ Նա պարզաբանեց, որ խորհրդարանի հայտարարության մեջ, որի նախագիծը նախօրեին առաջարկել էր ընդդիմությունը, ձեւակերպումներ ամրագրելու դեպքում Հայաստանը անհարմարություններ կստեղծի բանակցային գործընթացի, ինչպես նաեւ նրան աջակցող երկրների համար։ «Այս տրամաբանությամբ խորհրդարանն, ըստ էության, կճանաչեր Ղարաբաղի անկախությունը։ Սա կփակեր բանակցային գործընթացը եւ ոչ թե Ադրբեջանի, այլ միջնորդների հետ»,- հավելեց նա։
Հիշեցնենք, որ անցյալ շաբաթ «Քաղաքացիական պայմանագիր» կուսակցության խմբակցությունը ձեռնպահ էր քվեարկել «Հայաստան» ընդդիմադիր դաշինքի կողմից Ադրբեջանի Միլլի Մեջլիսին ի պատասխան պատրաստած հայտարարության նախագծի քվեարկության ժամանակ։
