Եվրամիությունը, Ռուսաստանի դեմ պատժամիջոցների իններորդ փաթեթի շրջանակներում, դիտարկում է անօդաչու թռչող սարքերի (ԱԹՍ) ոլորտում սահմանափակումներ մտցնելու հնարավորությունը, հայտնում է Bloomberg-ը։
Նրա աղբյուրների համաձայն՝ նոր սահմանափակումների առաջարկը պաշտոնապեսայս շաբաթ կարող է ներկայացվել եւ քննարկվել։ ԵՄ-ն նախատեսում է հաջորդ շաբաթ միության երկրների ղեկավարների հանդիպումից առաջ համաձայնեցնել պատժամիջոցների փաթեթը:
Ավելի վաղ Politico թերթը, վկայակոչելով դիվանագետներին, տեղեկացրել էր, որ Եվրահանձնաժողովը եւ ԵՄ երկրների ներկայացուցիչները հանգստյան օրերին քննարկել են Մոսկվայի դեմ պատժամիջոցների իններորդ փաթեթի պատրաստումը։ Պատժամիջոցների ցուցակներում առաջարկվում է ավելացնել 180 նոր կետ։ Ըստ թերթի՝ քննարկվում են նաեւ տեխնոլոգիաների, ֆինանսների եւ մեդիայի ոլորտին առնչվող միջոցառումներ։
Եվրամիությունը պատժամիջոցների արդեն ութ փաթեթ է սահմանել Ռուսաստանի դեմ փետրվարից, երբ Ռուսաստանը հատուկ ռազմական գործողություն սկսեց Ուկրաինայում։ Պատժամիջոցների վերջին փաթեթը հոկտեմբերի սկզբին է հաստատվել։
