Արգենտինայի փոխնախագահ եւ նախկին նախագահ Քրիստինա Ֆերնանդես դե Քիրշները դատապարտվել է վեց տարվա ազատազրկման, նրան արգելվել է նաեւ ցմահ պետական պաշտոն զբաղեցնել։ Երեք դատավորների կոլեգիան այսպիսի պատիժ է սահմանել՝ նրան մեղավոր ճանաչելով խարդախության այն սխեմայում, որի հետեւանքով իշխանությունները նրա նախագահ եղած ժամանակ յուրացրել են 1 մլրդ դոլար (856 մլն եվրո)՝ հանրային նախագծերի շրջանակում։ Դատարանը նաեւ մերժել է հանցավոր կազմակերպությունը գլխավորելու մեղադրանքը. այդ հոդվածով պատիժը կարող էր կազմել 12 տարի։
Ինչպես նշել է AP գործակալությունը, սա առաջին դեպքն է, երբ Արգենտինայի փոխնախագահը դատապարտվում է պաշտոնում գտնվելու ժամանակ; Դատավճիռն ուժի մեջ չի մտնի մինչեւ բողոքարկման քննումը, այդ գործընթացը կարող է տարիներ տեւել, նշել է AP-ը։ Ներկա պահին Արգենտինայի փոխնախագահը իմունիտետ ունի հետապնդումներից։
Քրիստինա Ֆերնանդես դե Քիրշները քննադատել է դատավճիռը՝ իրեն անվանելով «դատական մաֆիայի» զոհ։ Ավելի ուշ նա հայտարարել է, որ եկող տարի չի առաջադրվի նախագահի պաշտոնում։ Այդ պաշտոնում նա եղել է 2007-2015թթ.։
Նախկին նախագահի կողմնակիցները հայտարարել են համազգային գործադուլի հնարավորության մասին։ Նրանք հավաքվել են Բուենոս Այրեսի կենտրոնում եւ քայլերթով մոտեցել դաշնային դատարանի շենքին, որը Քիրշներին մեղավոր է ճանաչել։ Քայլերթի մասնակիցները թմբուկներ են զարկել եւ բղավել՝ հաղթահարելով ոստիկանական պատնեշները։
