Հայ ժողովուրդը բախվել է անվտանգության նոր սպառնալիքների, որոնք մինչ այժմ չեն վերացվել։ Այս մասին դեկտեմբերի 12-ին «Ցեղասպանություն հանցագործության դեմ» 4-րդ գլոբալ համաժողովի ժամանակ ասել է ՀՀ արտաքին գործերի նախարար Արարատ Միրզոյանը։

Նրա խոսքով՝ այս իրավիճակը երկարաժամկետ գործընթացի հետեւանք է, ծայրահեղ ատելության տարածումը հայերի հանդեպ երկար տարիների ընթացքում եւ ռազմական պոտենցիալի հետեւողական զարգացումը արդյունքում վերածվեցին ուժի կիրառման։

Նա տեղեկացրել է, որ «Ցեղասպանություն հանցագործության դեմ» 4-րդ գլոբալ համաժողովը չի հաջողվել իրականացնել 2020թ. դեկտեմբերին համավարակի պատճառով, բայց նաեւ, առաջին հերթին, Լեռնային Ղարաբաղի ժողովրդի դեմ Ադրբեջանի սանձազերծած 44-օրյա պատերազմի պատճառով։ Այդ ագրեսիայի հետեւանքներն առ այսօր հաղթահարված չեն։

«Ավելին, անցած տարվա նոյեմբերին եւ այս տարվա սեպտեմբերի 13-14-ին Ադրբեջանի հարձակմանն է ենթարկվել Հայաստանի ինքնիշխան տարածքը, ինչի հետեւանքով տեղի են ունեցել մարդու իրավունքների եւ միջազգային հումանիտար իրավունքի, այդ թվում կյանքի, սեփականության իրավունքի, կտտանքների արգելքի եւ ռազմագերիների հետ վարվելու կանոնների կոպիտ խախտումներ»,- նշել է նախարարը։