Սա Ադրբեջանի իշխանությունների կողմից ուղիղ կազմակերպված սադրանք է՝ ուղղված նաև ռուս խաղաղապահների գործունեությանը, ինչպես նաև հերթական քայլերն են՝ Արցախը հայաթափելու, էթնիկ զտման ենթարկելու և իրենց հրեշավոր ծրագրերը կյանքի կոչելու համար: Այս մասին, այսօր՝ դեկտեմբերի 13-ին, լրագրողների հետ զրույցում նշեց ՀՅԴ ԳՄ անդամ, «Հայաստան» խմբակցության պատգամավոր Իշխան Սաղաթելյանը՝ անդրադառնալով Լաչինի միջանցքում ստեղծված ճգնաժամային իրավիճակի պատճառներին:
Սաղաթելյանը շեշտեց՝ այս ամենը թույլ տալ որևէ պարագայում չի կարելի, Հայաստանի իշխանությունները պետք է գործեն։
«Հայաստանի Հանրապետության այսպես կոչված իշխանությունները պարտավոր են քայլեր ձեռնարկել, հրաժարվել իրենց թուրքահպատակ քաղաքականությունից, և Հայաստանի Հանրապետությունը պետք է ստանձնի Արցախի անվտանգության և Արցախի ժողովրդի ինքնորոշման իրավունքի իրացման հանձնառությունը»,- շեշտեց պատգամավորը՝ հավելելով՝ ամբողջ խնդիրն այն է, որ գործող իշխանությունը մինչև հիմա դա չի անում։
«Նրանք ասում են, որ դա ռուս խաղաղապահների պատասխանատվության գոտին է, և ամեն ինչ պետք է անեն նրանք։ Իհարկե, ռուս խաղաղապահները պետք է ամբողջությամբ իրականացնեն իրենց առաքելությունը, բայց Հայաստանի Հանրապետությունը չի կարող իր ձեռքերը լվանալ։ Քանի որ, դժբախտաբար, նրանք են ներկայացնում Հայաստանի Հանրապետությունը, պարտավոր են շատ հստակ քայլեր և գործողություններ անել՝ սկսած բոլոր պետական ինստիտուտների կողմից շատ հստակ և հասցեական հայտարարություններից, վերջացրած կոնկրետ քայլերով ու գործողություններով, քանի որ ամեն զիջում բերելու է նոր զիջման, նոր կուրստների, Արցախի վերջնական կորստի»,- ընդգծեց Իշխան Սաղաթելյանը։
Այնուհանդերձ, ընդդիմադիր պատգամավորի գնահատմամբ, ոչինչ ավարտված չէ, ստեղծված իրավիճակից դուրս գալու հնարավորություն կա։
«Պետք է կարողանանք դիմադրություն ցույց տալ, խառնել բոլորի խաղաքարտերը։ Դրա ուժը մեր ժողովուրդն է, հայ մարդն է։ Պետք է շատ հստակ միջազգային հանրության առջև ձևակերպենք մեր պահանջները, երկու ճակատով պետք է կռիվ տանք»,- հայտարարեց Իշխան Սաղաթելյանը։