Եթե Ադրբեջանը «մարսի» Արցախի թեման, ապա այդ նույն «էկոակտիվիստների» միջոցով ցանկություն կհայտնի տիրանալ ամբողջ Սյունիքի մարզին։ Այս մասին NEWS.am-ի հետ զրույցում ասաց «Այլընտրանքային նախագծեր» խմբի փորձագետ, քաղաքագետ Վահե Հովհաննիսյանը։
«Մի օր կգան 500 ադրբեջանցի «էկոակտիվիստներ» եւ կասեն, թե, իբր, Ամուլսարն ու Քաջարանի կոմբինատը կանգնած են բնապահպանական աղետի առաջ։ Պետք չէ մոռանալ, որ Կապանի վերեւում ադրբեջանական դիրքեր կան։ Բաքուն ոչ միայն ճանապարհ է ուզում, այլեւ ամբողջ Սյունիքն ու Սեւանը։ Երբ Հայաստանն ուժեղ էր, Ադրբեջանը 30 տարի լռում էր, թեեւ նույնն էր ուզում»,-ասաց Հովհաննիսյանը։
Նրա խոսքով՝ այսօր Ադրբեջանի նպատակն է վերջնականապես ոչնչացնել Արցախում հայկական պետականության մնացորդները, լուծարել Արցախի իշխանությունը՝ որպես պետականության ատրիբուտ, միջամտել Արցախի կյանքի, բնական ռեսուրսների կառավարմանը եւ այլն։
«Բաքուն կփորձի հասնել արցախահայության առավելագույն վտարմանը եւ փակել Արցախի թեման, ուստի մենք պետք է ազատվենք վարդագույն ակնոցներից եւ հասկանանք, թե ինչպես ենք դրան դիմակայելու»,-հավելեց Հովհաննիսյանը: Նա կարծում է, որ Հայաստանն ունի ռեսուրսներ, պարզապես դրանք պետք է հաշվարկել։
