Թուրքիան ձգտում է մեկ տարվա ընթացքում երկիրը էներգետիկ հանգույցի վերածելու նախագիծ սկսել։ Այս մասին հայտարարել է էներգետիկայի եւ բնական պաշարների նախարար Ֆաթիհ Դոնմեզը, փոխանցում է Sabah-ը։
«Այս հարցը պետք է առանձին գնահատվի իրավական, առեւտրային եւ տեխնիկական տեսանկյունից»,- ասել է Դոնմեզը: Նա հստակեցրել է, որ նման էներգետիկ հանգույցը կախված կլինի ոչ միայն ռուսական գազից, այլեւ դիվերսիֆիկացված աղբյուրներից։ «Մենք բանակցում ենք ինչպես Ռուսաստանի, այնպես էլ այլ երկրների հետ։ Պարոն Պուտինը նման առաջարկ ուներ։ Նրա եւ նմանատիպ առաջարկներն օգնեցին արագացնել գործընթացը»:
Նշելով, որ այս նախագծի իրականացումը չի կարելի սպասել երեքից հինգ ամսվա ընթացքում, նախարարն ասել է. «Մեր նպատակն է մեկ տարվա ընթացքում ստեղծել նման շուկա։ Միգուցե անցումային շրջանում սկսենք ավելի սահմանափակ քանակությամբ շուկաներից… Բնական գազը գալիս է ոչ միայն Ռուսաստանից, մենք արդեն ունենք համագործակցություն Մոսկվայի հետ պայմանագրերի հիման վրա։ Մենք գնում ենք այս գազը, քանի որ դրա կարիքն ունենք։ Նման շուկայի համար մեզ անհրաժեշտ են նոր պայմանագրեր եւ նոր մատակարարներ»,- ասել է Դոնմեզը՝ մատնանշելով, որ Թուրքիայի սեփական սպառումը կազմում է մոտ 55-60 միլիարդ խորանարդ մետր։
«Եվրոպա գազ արտահանելու եւ վաճառելու համար նոր պայմանագրեր են անհրաժեշտ», թեեւ դեռ հայտնի չէ, թե ովքեր են լինելու այդ նոր մատակարարներն ու գնորդները։ Նման շուկան, էներգետիկ հանգույցի կառուցման շրջանակներում, գնորդներին հնարավորություն կտա ընտրելու, թե որ մատակարարից կցանկանան գնել իրենց գազը։
