Շփման գծում ամենից ծանր իրավիճակը ստեղծվել է Հայաստանի երեք մարզերում՝ Արտանիշից մինչեւ Ծավ, ներառյալ Ճակատեն, Ներքին Խանդ, Սեւ լիճ, Իշխանասար, Շորժա, Ջերմուկ։ Այս մասին հունվարի 11-ին կայացած քննարկման ժամանակ ասաց ընդդիմադիր պատգամավոր Տիգրան Աբրահամյանը։
Նա պարզաբանեց, որ հակառակորդն այս վայրերում պլացդարմ է ձեւավորում, ինչը հնարավորություն է ստեղծում հետագա հարձակողական գործողությունների, Հայաստանի կարեւորագույն ենթակառուցվածքների նկատմամբ վերահսկողության եւ պաշտոնական Երեւանի վրա ճնշում գործադրելու համար։
Ինչ վերաբերում է Լեռնային Ղարաբաղում ճգնաժամին եւ էլեկտրաէներգիայի հետ կապված խնդիրներին, պատգամավորը հիշեցրեց, որ Լաչինի միջանցքի նոր երթուղով էլեկտրահաղորդման գծեր չեն անցկացվել, ինչպես խոստացել էին Հայաստանի իշխանությունները։
Աբրահամյանը դեմ արտահայտվեց ներկայիս պայմաններում Ադրբեջանի եւ Լեռնային Ղարաբաղի միջեւ ուղիղ բանակցություններին։ «Դրանք հավասար սուբյեկտների միջեւ բանակցություններ չեն լինելու։ Դրանք միայն կարագացնեն Ադրբեջանի կողմից ԼՂՀ-ի կլանումը»,- նշեց պատգամավորը։
Անվտանգության ոլորտում խնդիրների լուծման ամենաարագ ճանապարհ նա անվանեց Հայաստանի իշխանությունների հրաժարականը։