Արցախում գազամատակարարման դադարեցումն ավելի է խորացրել առկա հումանիտար ճգնաժամը։ Այս մասին այսօր՝ հունվարի 17-ին, NEWS.am-ի հետ զրույցում ասաց Ասկերանի վարչական ղեկավար Համլետ Ապրեսյանը։
«Այժմ տեղեկությունների հավաքագրման գործընթաց է սկսվել՝ թե գազամատակարարման դադարեցման հետեւանքով ինչ տեսակի խնդիրներ են առաջանալու տարբեր համայնքներում, ինչ ձեռնարկություններ են կանգնելու փակման շեմի առջեւ։ Առաջանալու է նաեւ մատակարման խնդիր՝ օրինակ Ստեփանակերտից առաջին անհրաժեշտության ապրանքները տեղափոխվում են գազի միջոցով, հավանաբար պետք է ավտոմեքենաների քանակը խիստ սահմանափակել»,- ասաց Ապրեսյանը։
Նրա խոսքով՝ բենզինի պաշար կա, սակայն նախատեսված է հատուկենտ դեպքերի, ոչ թե ամենօրյա օգտագործման համար։ Բացի մատակարար ավտոմեքենաներից, գազից օգտվում են նաեւ ուղեւորափոխադրող միջոցները։
«Վարչական շրջանը սպասարկում են գազ օգտագործող երթուղայինները, դրանք կկրճատվեն, չեմ բացառում, որ ընդհուպ որոշ համայնքներում երթուղիները դադարացվեն, այսինքն՝ որոշ համայնքներով չանցնեն ավտոբուսները։ Սրանք դեռեւս վերջնական որոշված չեն, հաշվարկներ են պետք անել»,- ընդգծեց Ապրեսյանը։
Համլետ Ապրեսյանի խոսքով՝ վարչական շրջանում շատ են դպրոցները, որոնք ջեռուցվում են գազով․ «Այս դպրոցներում ջեռուցումը հավանաբար պետք է իրականացվի վառարանների միջոցով։ Հիմա տեղեկություն չունենք՝ այդ դպրոցներում դասերը կդադարեցվեն, թե ոչ»։
Համլետ Ապրեսյանի խոսքով՝ գազով ջեռուցվող տների բնակիչները նախկին անջատումներից հետո իրենց համար ձեռք են բերել այլընտրանքային միջոցներ, որոնք հիմնականում էլեկտրաէներգիայով են սնուցվում։
