Նորվեգիան նախատեսում է արկտիկական նավթի եւ գազի հետախուզական բլոկերի ռեկորդային քանակ առաջարկել՝ ձգտելով երկարացնել ածխաջրածինների արդյունահանումը, հաղորդում է Reuters-ը:
Եվրոպայում գազի ամենախոշոր մատակարարը եւ հում նավթի խոշոր արտահանողը՝ Նորվեգիան, Բարենցի ծովում գտնվող էներգետիկ ընկերություններին առաջարկում է 78 բլոկ, ինչը ամենաբարձր ցուցանիշն է 2003 թվականին այսպես կոչված APA լիցենզավորման փուլի մեկնարկից ի վեր:
Օսլոն նախատեսում է նաեւ առաջարկել 14 նոր բլոկ Նորվեգական ծովում, որը տարածվում է Հյուսիսային ծովից հյուսիս եւ Արկտիկական շրջանից այն կողմ՝ առաջարկվող բլոկերի ընդհանուր քանակը հասցնելով 92-ի:
Նավթի եւ գազի արդյունահանումը շարունակելու Նորվեգիայի ձգտումը պայմանավորված է նրանով, որ էներգետիկ ընկերությունները հակասական ճնշման տակ են. մի կողմից նրանք պետք է ածխաջրածիններ արդյունահանեն, բայց ոչ՝ Ռուսաստանից, իսկ մյուս կողմից՝ սահմանափակեն կլիմայի փոփոխության հետեւանքները:
Նորվեգիայի պաշտոնական գնահատականների համաձայն՝ Բարենցի ծովը կարող է պարունակել նավթի եւ գազի պաշարների երկու երրորդը, որոնք դեռ պետք է հայտնաբերվեն Նորվեգիայի ափերի մոտ:
