Վերակենդանացման բաժանմունքում գտնվող սպան հոգեբանական ծանր վիճակում է գտնվում: Այս մասին, այսօր՝ հունվարի 29-ին, Քննչական կոմիտեի մոտ բողոքի ակցիայի ժամանակ լրագրողների հետ զրույցում ասաց «Հայաստան» խմբակցության պատգամավոր Գառնիկ Դանիելյանը:
«Ինքս բազմիցս եղել եմ դիրքերում, կան լավ կահավորված դիրքեր, որոնք ավելի շատ ցուցադրական են, եւ կան բազմաթիվ խնդիրներ, որոնք այս պահին մի քիչ նպատակահարմար չէ բարձրաձայնել: Այդ խնդիրներից որոշների մասին ԱԺ ամբիոնից բարձրաձայնում ենք, սակայն մեծ մասի մասին առանձին զրույցներում ենք մատնանշում, քանի որ հակառակ պարագայում թշնամին էլ է տեղեկանալու դրանց մասին։
Այս իշխանությունները մատը մատին չեն տալիս այդ խնդիրները լուծելու համար ։ Ասում ենք՝ խնդիրների մասին, մատնանշում, բայց իրենք ոչ ադեկվատ են վերաբերվում դրանց։ Քաղաքական հարց չէ, մեր երեխաներն են, բանակը մեր բոլորինն է։ Այդ խնդիրներին պետք է վերաբերել ադեկվատ, այդ խնդիրների գոնե որոշ մասն արդեն լուծած պետք է լինեին»,- ասաց ընդդիմադիր նա՝ որպես օրինակ բերելով այն, որ այդ Ազատ գյուղի զորամասում զինվորներից մեկի ծնողն է գնացել էլեկտրականություն քաշել:
Ընդդիմադիր պատգամավորի խոսքով, աբսուրդ է, որ հիմա խոսում են ինչ-որ բարեփոխումների մասին՝ տարրական պայմաններ չստեղծելով զինծառայողների համար. «Ամենօրյա շփման մեջ եմ այդ կառույցում ծառայություն իրականացնող մարդկանց հետ, հավատացեք՝ բանակն ամեն ինչի կարիք էլ ունի։ Ցավով եմ ասում, բայց շատ բանի կարիք ունի՝ սկսած ամենատարրական բաներից։
Խոսում են մոդուլային տնակներից։ Ախր աբսուրդ է։ Հայաստանում ամեն հնարավորությունը կա մեկ օր առաջ այդ կացարանների վիճակը փոխելու համար։ Ի՞նչ է նշանակում Իտալիայից մոդուլային տնակներ պետք է գան»,- ասաց Գառնիկ Դանիելյանը։
Նա նշեց, որ երբ Նիկոլ Փաշինյանը հունվարի 19-ի ողբերգականա դեպքից մի քանի ժամ անց գնահատական է հնչեցնում, այդպես ուղղորդում է քննչական մարմիններին, արդեն պարտադրվում է այդ կարծիքը. «Սպայի ընտանիք հետ էլ եմ խոսել, վրդովված են, որ իրենց զավակը վերակենդանացման բաժանմունքում է, իսկ այդտեղ արդեն մեղավորներ են նշանակվում։ Այդ ընտանիքը թիրախավորվել է: Նաեւ իրենց անվտանգության հարցը կա»,- ասաց պատգամավորը։
Նա նշեց, որ չի պատկերացնում մի երկրի, որտեղ նման ողբեգություն տեղի ունենար ու պաշտպանության նախարարը հրաժարական չտար։