Մեր նախորդ համագումարից անցել է 4 տարի, ամոթալի 4 տարի, երբ պետականությունը զավթած իշխանությունը փորձում է պետությունը տանել անկման: Այս մասին, այսօր՝ փետրվարի 6-ին, Երեւանում ՀՅԴ Երիտասարդական Համաշխարհային համագումարի բացման ժամանակ իր խոսքում նշեց ՀՅԴ Հայաստանի «Նիկոլ Աղբալյան» ուսանողական միության վարչության ներկայացուցիչ Հայկազուն Հարությունյանը:
«2018-ից կեղծ գաղափարներով փողոց հանեցին հայ երիտասարդությանը եւ խժռեցին նրանց ներուժը, որը հետագայում պետք է դառնար պատմական արդարության եւ արժանապատվության համար պայքարող տեսակի կամքի ու տոկունության նվազեցման պատճառ: Սա ստիպեց մեզ, որ որդեգրենք քաղաքական գիտակցության, արժեհամակարգային սովի հագեցման գործիքները եւ հայ երիտասարդությանը կրթենք այս ուղղությամբ: Այս ամենի հետեւանքը կանգնեց 2020 թվականի սեպտեմբերի 27-ին: Ոտքի կանգնեց ազգի սերուցքըւ, այդ թվում ՀՅԴ երիտասարդները: Ունեցանք դաշնակցական երիտասարդներից բազում զոհեր»,-ասաց նա:
Հայկազուն Հարությունյանի խոսքով, ՀՀ օրվա իշխանությունները հետեւողականորեն սկսել են քանդել, ոչնչացնել մեր «ես»-ը. «Սա պատճառ էր, որ մենք մեր «ես»-ի պահպանման համար ամենուր պայքարել՝ թե թշնամու, թե ներքին թշնամու առջեւ: Ամոթալի կապիտուլյացիայից հետո այս ամենը շարունակվեց:
Այսօր մեզ անհրաժեշտ է մեր ճակատագիրը փոխել, վերածննդի մոհիկանը պետք է լինի, անշուշտ, երիտասարդությունը, իսկ երիտասարդության առաջամարտիկը՝ ազգային ոգով կրթված հայ երիտասարդը, այդ թվում ՀՅԴ-ական երիտասարդությունը»:
Նշենք, որ Երևանում այսօր մեկնարկել է ՀՅԴ Երիտասարդականի Համաշխարհային համագումարը: Մինչ ելույթները համագումարի մասնակիցները հոտնկյաս ունկնդրել են Հայաստանի, Արցախի օրհներգները, ՀՅԴ քայլերգը, ապա մեկ րոպե լռությամբ հարգել հայրենիքի պաշտպանության գործում, բոլոր ժամանակներում ազգային ազատագրական պայքարում զոհվածների հիշատակը։
Համագումարը իր մեջ ներառում ու համախմբում է ավելի քան 15 երկրների ՀՅԴ երիտասարդական եւ ուսանողական 33 կազմակերպություններ: Այն նպատակ ունի քննարկելու եւ համադրելու առաջիկա քառամյա գործունեության աշխատանքները: Այն կշարունակվի մինչև փետրվարի 10-ը։ Համագումարի շրջանակում միջոցառումներ տեղի կունենան նաև Սյունիքում։ Այս տարի լրանում է ՀՅԴ երիտասարդականի 90-ամյակը:
