Հայաստանի իշխանությունները կսկսեն առգրավել փողոցներում ապօրինի վաճառվող պարենային ապրանքները։ Այս մասին այսօր՝ փետրվարի 9-ին, Ազգային ժողովի նիստում վարչական իրավախախտումների վերաբերյալ օրենսգրքում փոփոխություններ եւ լրացումներ կատարելու եւ հարակից օրենքներում փոփոխություններ կատարելու մասին օրինագծերի փաթեթի քննարկման ժամանակ հայտարարեց տարածքային կառավարման եւ ենթակառուցվածքների փոխնախարար Վաչե Տերտերյանը։
Նրա խոսքով՝ հատկապես Երեւանում գյուղմթերքների ապօրինի առեւտրի համար նախատեսված տուգանքները շատ չեն զսպում իրավախախտներին: Վարչական գործիքակազմը, որով օժտված են տեղական ինքնակառավարման մարմինները, փոխնախարարի կարծիքով, բավականաչափ արդյունավետ չէ։
«Մենք առաջարկում ենք լրացուցիչ մեխանիզմ՝ ապրանքի բռնագրավման տեսքով։ Միայն տուգանքներով փողոցային ապօրինի առեւտրի դեմ պայքարն անարդյունավետ կլինի»,-ասաց Տերտերյանը։
Այս խնդիրը, ինչպես նշեց փոխնախարարը, ուղղակիորեն կապված է հիգիենայի եւ սանիտարական հարցերի հետ։
«Սակայն խնդիրը միայն քաղաքացիների առողջության ապահովումը չէ։ Դա վերաբերում է նաեւ անբարեխիղճ մրցակցությանը։ Այս ոլորտում ապօրինի գործունեության հետ մեկտեղ գործում են օրինական գրանցված սուբյեկտներ»,-նկատեց փոխնախարարը։
Բացի այդ, ապօրինի փողոցային առեւտուրը, որպես կանոն, խոչընդոտում է առկա ենթակառուցվածքների օգտագործմանը: Խոսքը, մասնավորապես, մայթերի սանիտարական մաքրման մասին է եւ այլն։
