Ոստիկանության Էրեբունու բաժանմունքում մեր գործընկեր փաստաբանների նկատմամբ կիրառվել է բռնի ուժ, հայհոյանքներ, խոչընդոտել են իրենց մասնագիտական  գործունեությունը: Այս մասին այսօր՝ փետրվարի 10-ին, մամուլի ասուլիսի ժամանակ նշեց Փաստաբանների պալատի նախագահ Սիմոն Բաբայանը:

«Ըստ էության, որոշ պաշտոնատար անձինք, որոնք աշխատում են ոստիկանության համակարգում, մոռանում են, որ փաստաբանն ունի բացառիկ առաքելություն, որը երաշխավորված է Սահմանադրությամբ:

Ես դետալների մեջ չեմ մտնի, ուղղակի կհայտարարենք, որ անելու ենք ամեն ինչ մեր գործընկերի խախտված իրավունքները պաշտպանելու համար: Այս երեւույթները ստվերում են փաստաբանական ինստիտուտը»,-ասաց նա:

Իր հերթին Փաստաբանների պալատի նախկին նախագահ, այժմ «Զարթոնք» կուսակցության ղեկավար Արա Զոհրաբյանն ասաց. «Անչափահասներին ոստիկանների կողմից ծեծի ենթարկելու եւ բերման ենթարկելու փաստով մեր գործընկերներ գնացել են անչափահասի առերեսմանը, որը պետք է առերեսվեր ոստիկանության օպեր աշխատողի հետ: Էրեբունւ բաժնում հոգեբանական ճնշում են փորձել գործադրել  փաստաբանների նկատմամբ, փաստաբանին ծաղրել են առերես հարցաքննության ժամանակ, հետո էլ սադրանքի արդյունքում դուրս են հանել եւ միջանցքում ոստիկաններով հարձակվել ծեծել են, հայհոյյել: Մյուս փաստաբանը ձայների վրա դուրս է եկել, նրան էլ են ծեծել, հայհոյել:

Երեկ նաեւ փաստաբանների պալատի նախագհն է գնացել դեպքի վայր, տեղում փորձել են արդարանալ, որ փաստաբանը վիրավորական խոսք է հնչեցրել, դրա համար, ըստ իրենք,  իրենք իրավունք ունեն  պատժելու: Նույնիսկ եթե ընդունենք, որ փաստաբանը վիրավորական խոսք է ասել ոստիկանին, դրա համար կա փաստաբանների պալատ, որտեղ կարող էին դիմել: Եթե հանցագործություն էր պարունակում մեր գործընկերոջ արարքը, ի վերջո, կա քրեադատավարական  ընթացակարգ: Ի՞նչ է նշանակում փողոցային հասկացողություններով փաստաբաններին ծեծել: Սա անընդունելի արարք է»,-ասաց Արա Զոհրաբյանը:

Նա կոչ արեց ՀՀ ոստիկանապետին, ՆԳ նախարարին արագ միջոցներ ձեռնարկել. «Այն բոլոր ոստիկաններին, որոենք ներգրավված են եղել ծեծելու գործընթացի մեջ, պետք է կոնկրետ գնահատական տրվի նրանց արարքին, քրեաիրավական գնահատականից զատ, նրանց լիազորությունները առնվազն պետք է կասեցվի: Նրանք չեն կարող ոստիկան լինել»,-ասաց Զոհրաբյանը:

Նշենք, որ ոստիկանության Էրեբունու բաժնում բռնության ենթարկված փաստաբաններն են Մարզպետ Ավագյանը եւ Էմանուել Անանյանը:

Էրեբունիի բաժնում ոստիկանները ծեծի են ենթարկել երկու փաստաբանի. Փաստաբանների պալատի խոսնակ