Թբիլիսիի կենտրոնում այսօր «Պահպանողական շարժում» եւ «Ալտ Ինֆո» պլատֆորմի ներկայացուցիչներն էին, որոնք հանդես են գալիս Ռուսաստանի հետ հարաբերությունները կարգավորելու օգտին եւ դեմ են Արեւմուտքի ազդեցությանը, տեղեկացրել է «Новости -Грузия»-ն։
Ցուցարարների շարասյունն անցել է Ռուսթավելու պողոտայով եւ մոտեցել խորհրդարանի շենքին։ Այստեղ ցույցի մասնակիցները պահանջել են հանրաքվե անցկացնել Վրաստանում՝ օտարերկրյա գործակալների մասին օրենքի վերաբերյալ։ Հավաքվածները հանդես են եկել Վրաստանի դրոշների ներքո եւ վանկարկել են «Սաքարթվելո»։
Նրանք նաեւ պահանջել են պատժել նրանց, ովքեր բռնի գործողություններ են կատարել Թբիլիսիում «Օտարերկրյա ազդեցության թափանցիկության մասին» օրենքի դեմ ցույցերի ժամանակ, առաջին հերթին նրանց, ովքեր «Մոլոտովի կոկտեյլներ» են նետել։
Ցուցարարները պահանջել են նաեւ ազատ արձակել ԼԳԲՏ-ի հակառակորդ դատապարտվածներին, որոնք 2021թ. հուլիսի 5-ին հարձակվել էին «Թբիլիսի Փրայդ» օֆիսի եւ հեռուստաալիքների նկարահանող խմբերի վրա։
Ցույցի մասնակիցները վայր են նետել խորհրդարանի առջեւի ԵՄ-ի դրոշը, տրորել այն եւ այրել։ Ոստիկանությունը տեղի ունեցածին չի միջամտել։