Մի քանի բնապահպանական կազմակերպություններ դատի են տվել ԱՄՆ նախագահ Ջո Բայդենին՝ ConocoPhillips նախագծին հավանություն տալու որոշման համար, որը կապահովի նավթի եւ գազի հանքեր Ալյասկայի հյուսիս-արեւմուտքում, գրում է Politico-ն։
Հայցում նշվում է, որ հորատման տեղամասերը նախատեսվում է կառուցել զգայուն միջավայրում։ Ըստ կազմակերպությունների՝ հորերը զգալիորեն կազդեն տարածաշրջանի ջրի, օդի որակի, ինչպես նաեւ մարդկանց ու կենդանիների կյանքի վրա։ Բնապահպան ակտիվիստներն ասել են, որ նախագծի հաստատումը խախտում է բնապահպանական չորս օրենքները, չնայած այն հանգամանքին, որ հողի կառավարման բյուրոն կրճատել է դրա սկզբնական շրջանակը:
Կազմակերպությունները գերատեսչությանը մեղադրել են Ալյասկայի բնիկների հողերին հասցված վնասը գնահատելու անկարողության մեջ: Հայցում նաեւ ասվում է, որ Ձկների եւ վայրի բնության պահպանության ծառայությունը չի կարողացել պատշաճ կերպով դիտարկել հորերի հնարավոր ազդեցությունը անհետացող տեսակների, այդ թվում՝ սպիտակ արջերի վրա:
Հանքի մշակմամբ կզբաղվի ConocoPhillips Willow-ի դուստր ձեռնարկությունը: Ըստ հաշվարկների՝ նավթի արդյունահանումը կկազմի մոտ 600 մլն բարել, իսկ ջերմոցային գազերի արտանետումների ծավալը՝ տարեկան 280 մլն տոննա։
2022 թվականի սեպտեմբերին ԱՄՆ վեց նահանգներ հայց էին ներկայացրել Բայդենի, կրթության նախարարության եւ նրա ղեկավար Միգել Կարդոնայի դեմ՝ որոշ ամերիկացիների համար ուսանողական պարտքերը դուրս գրելու որոշման պատճառով իշխանության չարաշահման համար: Հայցվորները հայտարարել էին, որ նախագահն իրավունք չունի միլիոնավոր մարդկանց ազատել իրենց կամովին ստանձնած պարտքերը վճարելու պարտավորությունից։