Թուրքիայի արտաքին գործերի նախարար Մեւլութ Չավուշօղլուն տեղեկացրել է, որ ֆինն գործընկերոջ՝ Պեկա Հաավիստոյի հետ քննարկել է ՆԱՏՕ-ի ընդլայնման հարցը։
Այցով Թուրքիայում է գտնվում Ֆինլանդիայի նախագահ Սաուլի Նիինիստյոն։ Ֆինլանդիայի նախագահի այցը սկսվել է հինգշաբթի, Թուրքիայի հարավ-արեւելք՝ երկրաշարժերի գոտի այցելությամբ, տեղեկացրել է Ֆինլանդիայի նախագահի գրասենյակը։ Սկզբում տեղեկացվել էր, որ Ֆինլանդիայի եւ Թուրքիայի նախագահների բանակցությունները տեղի են ունենալու Ստամբուլում, բայց ավելի ուշ դրանք տեղափոխվել են Անկարա, ճշտել է ֆիննական մամուլը։
«Ֆինլանդիայի նախագահի այցից առաջ մենք հանդիպեցինք Ֆինլանդիայի արտաքին գործերի նախարարի հետ։ Մենք քննարկեցինք ՆԱՏՕ-ի ընդլայնման հարցերը եւ շնորհակալություն հայտնեցինք նրանց երկրաշարժերի հետեւանքների վերացմանն օժանդակելու համար»,- գրել է Չավուշօղլուն Թվիթերում։
