2022 թվականը Հայաստանի համար շատ դինամիկ էր։ Հատկապես ԵՄ-ի եւ միության անդամ երկրների հետ փոխհարաբերությունների մասով։ Այս մասին Ազգային ժողովում, մարտի 17-ին, եվրոպական ինտեգրման խորհրդարանական մշտական հանձնաժողովի նիստում «Հայաստանի Հանրապետության կառավարության 2022թ. (2021-2026թթ.) ծրագրի իրականացման ընթացքի եւ արդյունքների մասին» հաշվետվության քննարկման ժամանակ ասել է արտաքին գործերի փոխնախարար Պարույր Հովհաննիսյանը։
Խոսքը, ըստ նրա, մասնավորապես, Հարավային Կովկասի տարածաշրջանում Բրյուսելի միջնորդական ջանքերի մասին է։
«Դրա վառ ապացույցն է Հայաստանում ԵՄ-ի մոնիթորինգային առաքելության ծավալումը»,- ասել է Հովհաննիսյանը։
Եվրամիության այս որոշումը, ինչպես նշել է փոխնախարարը, զգալիորեն նպաստել է տարածաշրջանում իրավիճակի կայունացմանը, հատկապես անվտանգության ապահովման մասով։
«Առաքելության այցն օգնել է եվրոպացիներին ավելի լավ հասկանալ ստեղծված իրավիճակը»,- նշել է կառավարության ներկայացուցիչը։