Հոնդուրասը դիվանագիտական հարաբերություններ է հաստատել Չինաստանի հետ՝ Թայվանի հետ հարաբերությունները խզելուց հետո, որն ավելի ու ավելի է մեկուսացվել եւ ներկայումս ճանաչված է միայն 13 ինքնիշխան պետությունների կողմից, հաղորդում է Associated Press-ը:
Չինաստանի եւ Հոնդուրասի ԱԳ նախարարները Պեկինում ստորագրել են համատեղ փաստաթուղթ։ Այս որոշումը Չինաստանի արտաքին գործերի նախարարության կողմից գնահատվել է որպես «ճիշտ ընտրություն»:
Երկրների միջեւ կապերը ծագում են Պեկինի եւ Վաշինգտոնի միջեւ աճող լարվածության ֆոնին եւ ազդարարում են Չինաստանի ազդեցության աճը Լատինական Ամերիկայում: Նոր հարաբերությունների մասին հայտարարվել է այն բանից հետո, երբ Հոնդուրասի եւ Թայվանի կառավարությունները հարաբերությունները խզելու մասին առանձին հայտարարություններ են արել։
Հոնդուրասի արտաքին գործերի նախարարությունը Twitter-ում հայտնել է, որ իր կառավարությունը ճանաչում է «աշխարհում միայն մեկ Չինաստան», եւ որ Պեկինը «միակ օրինական կառավարությունն է, որը ներկայացնում է ողջ Չինաստանը»։
Հոնդուրասը նաեւ հայտարարել է, որ «Թայվանը Չինաստանի տարածքի անբաժանելի մասն է, եւ այսօրվա դրությամբ Հոնդուրասի կառավարությունը Թայվանին տեղեկացրել է դիվանագիտական հարաբերությունները խզելու մասին՝ խոստանալով Թայվանի հետ որեւէ պաշտոնական հարաբերություն կամ կապ չպահպանել»։
Թայվանի արտաքին գործերի նախարար Ջոզեֆ Վուն կիրակի օրը կայացած մամուլի ասուլիսում ասել է, որ Թայվանը խզել է հարաբերությունները Հոնդուրասի հետ՝ «իր ինքնիշխանությունն ու արժանապատվությունը պաշտպանելու համար»։
Թայվանի եւ Հոնդուրասի միջեւ հարաբերությունները ժամանակին կայուն են եղել, նշել է նա՝ հավելելով, որ Չինաստանը չի դադարել «գայթակղել» Հոնդուրասին:
Հոնդուրասի վարչակազմը Թայվանից ֆինանսական օգնություն է խնդրել եւ համեմատել նրա առաջարկները Չինաստանի հետ, ասել է Վուն՝ մանրամասնելով այն աշխատանքը, որ Թայվանը կատարել է իր նախկին դաշնակցի զարգացմանը նպաստելու համար:
«Կաստրոյի կառավարությունը հրաժարվել է երկարամյա օգնությունից եւ մեր երկրի հետ հարաբերություններից եւ բանակցություններ է վարել Չինաստանի հետ դիվանագիտական հարաբերություններ հաստատելու նպատակով։ Մեր կառավարությունը ցավ ու ափսոսանք է ապրում», - ասել է նա:
Հոնդուրասը իններորդ դիվանագիտական դաշնակիցն է, որը Թայփեյը կորցրել է Թայվանի անկախության կողմնակից նախագահ Ցայ Ինգ Վենի պաշտոնավարումից ի վեր՝ 2016 թվականի մայիսին:
Չինաստանը եւ Թայվանը դիվանագիտական ճանաչման համար պայքարում են այն պահից, երբ 1949 թվականին քաղաքացիական պատերազմի ժամանակ բաժանվեցին:
Թայվանը դեռեւս կապեր է պահում Լատինական Ամերիկայի Բելիզի, Պարագվայի եւ Գվատեմալայի, ինչպես նաեւ Վատիկանի հետ։ Նրա մնացած գործընկերների մեծ մասը Կարիբյան եւ Հարավային Խաղաղ օվկիանոսի կղզի երկրներն են, եւ Էսվատինին՝ հարավային Աֆրիկայում: