Եվրամիությունը եւ Մեծ Բրիտանիան Հյուսիսային Իռլանդիայի վերաբերյալ նոր առեւտրային համաձայնագրի ստորագրումից հետո ակտիվացրել են պաշտպանական համագործակցության ամրապնդման շուրջ բանակցությունները, հաղորդում է Financial Times թերթը:
Օրակարգում են սպառազինությունների արտադրության, հետախուզական տվյալների փոխանակման, կիբեռանվտանգության, ահաբեկչության դեմ պայքարի ոլորտներում հարաբերությունների ամրապնդումը, Եվրոպական պաշտպանական գործակալության հետ Լոնդոնի համագործակցության ընդլայնումը: «Մենք հետաքրքրված ենք, եւ մենք միշտ բաց ենք եղել ռազմական հարցերի քննարկման համար»,-մեջբերում է թերթը ԵՄ ներկայացուցիչներից մեկի խոսքը։
Թերթը հիշեցնում է, որ 2022 թվականին Միացյալ Թագավորությունը միացել է մշտական կառուցվածքային համագործակցության եվրոպական ծրագրին (PESCO), որի նպատակն է արագացնել ռազմական գույքի տեղափոխումը եվրոպական մայրցամաք։
Հյուսիսային Իռլանդիայի հարցով Բրյուսելի եւ Լոնդոնի միջեւ ուրբաթ օրը կնքված գործարքը լուծել է Եվրամիությունից Մեծ Բրիտանիայի դուրս գալուց հետո ծագած գլխավոր խնդիրներից մեկը՝ Հյուսիսային Իռլանդիայի թագավորության կազմի մեջ մտնող եւ ԵՄ անդամ Իռլանդիայի միջեւ սահմանի անորոշ կարգավիճակը: