Անընդհատ խոսում ենք պետական մտածողության մասին ու չենք էլ արձանագրում, որ պետական մտածողությունն ամեն օր մեր աչքի առաջ ոտնահարվում է։ Այս մասին, այսօր՝ մարտի 30-ին, կառավարության նիստում հայտարարեց ՀՀ վարչապետ Նիկոլ Փաշինյանը:
«Այսօր ամեն օր կարելի է ականատես լինել ցնցոտիացված ՀՀ դրոշների: Շատ հաճախ մենք ուղղակի անցնում ենք՝ համարելով, որ այդպես էլ պետք է լինի: Պիտի խոստովանեմ, որ երբեք նման դեպքերի կողքով չեմ անցնում, տասնյակ անգամներով անդրադարձել եմ այս թեմային, իմ համոզմունքն է, որ մենք այստեղ պետք է իրավական լծակներ գործադրենք:
Հայաստանի բոլոր պետական մարմինները իրենց գործառույթների մեջ պարտադիր պետք է ունենան ՀՀ պետական սիմվոլների նկատմամբ համապատասխան խնամք: Բացի վարչական իրավախախտումների օրենսգրքից, կարծում եմ՝ աշխատանքային օրենսգրքում էլ պետք է փոփոխություններ անենք: Ասենք, եթե պետական պաշտոնյան երկրորդ անգամ դրոշին ներկայացվող պահանջները խախտելու դեպքով պատասխանատվության է ենթարկվել, աշխատանքային օրենսգրքով դա պետք է հիմք դառնա նրա հետ պայմանագիրը խզելու համար: Որովհետեւ եթե պետական սիմվոլների նկատմամբ հարգանք չունի, այդ մարդու հետ աշխատանքը նպատակահարմար չէ»,-ասաց վարչապետը:
Ինչ վերաբերում է մասնավոր անձանց, Փաշինյանը նկատեց, որ ոչ ոք չի պարտադրում անհատ քաղաքացուն, որ նա որեւէ տեղ դրոշ տեղադրի. «Դա ցանկացած քաղաքացու իրավունքն է, մենք կարող ենք խրախուսել, բայց չենք պարտադրում: Բայց ասում ենք՝ հարգելի քաղաքացի, եթե դուք կայացրել եք այդ որոշումը, ուրեմն բարի եղեք հետագա խնամքի մասին էլ մտածել: Չի կարելի թեկուզ պատշգամբից, բակում, տանիքին դրոշ տեղադրել եւ հետո 10 տարով մոռանալ այդ դրոշի խնամքի մասին: Այնտեղ, որտեղ կա դրոշ, պետք է պատշաճ տեսքի լինի: Եթե ոչ, պետք է վարչական լծակներ գործադրվեն»: