«Հայաստան» խմբակցության պատգամավոր Մհեր Սահակյանն առանց որեւէ հիմնավորման ոտքի է կանգնել եւ հարվածել «Քաղաքացիական պայմանագիր» խմբակցության պատգամավոր Վլադիմիր Վարդանյանին, որից հետո փախել ու թաքնվել է ԱԺ շենքում: Այս մասին այսօր՝ մարտի 31-ին, լրագրողների հետ զրույցում ասաց «Քաղաքացիական պայմանագիր» խմբակցության քարտուղար Արթուր Հովհաննիսյանը՝ անդրադառնալով այսօր ԱԺ-ում պետաիրավական հանձնաժողովի նիստին ՔՊ-ական պատգամավոր Վլադիմիր Վարդանյանի եւ «Հայաստան» խմբակցության պատգամավոր Մհեր Սահակյանին միջեւ եղած կոնֆլիկտին:
«Եթե այդ երիտասարդը խելացի լինի, ինքն իր ձեռքով կգրի մանդատից հրաժարվելու դիմումը, եթե ոչ, ապա մենք կհուշենք: Քրեաիրավական հետեւանքներ կկրեն, իրավապահ մարմինները կհուշեն»,- նշեց Արթուր Հովհաննիսյանը
Անդրադառնալով իր թիմակից Վահագն Ալեքսանյանի կողմից նախկինում ընդդիմադիր պատգամավորին հարվածելու դեպքին՝ Հովհաննիսյանն արձագանքեց. «Ի՞նչ կապ ունի, լավ է արել, հարձակվել է: Դրա մեկնաբանությունները տրվել են: Այդ մասին ամեն ինչ խոսվել է»: