Եթե շարունակենք «ինչուների» մեծ շղթան, կստացվի, որ 44-օրյա պատերազմի առաջնային թիրախը եղել է ոչ թե Լեռնային Ղարաբաղը, այլ մեր անկախությունը եւ ինքնիշխանությունը։ Այս մասին այսօր՝ ապրիլի 12-ին, Ազգային ժողովում հարցուպատասխանի ժամանակ հայտարարեց վարչապետ Նիկոլ Փաշինյանը՝ պատասխանելով «Քաղաքացիական պայմանագիր» խմբակցության պատգամավոր Անդրանիկ Քոչարյանի հարցին, թե ինչ փաստեր կան 5-րդ շարասյան գործողություններից եւ հնարավոր է, որ կա նաեւ 6-րդ շարասյունը։
«Երեկվա օրինակով՝ հարձակում է տեղի ունեցել Զինված ուժերի վրա, եւ մեկ էլ մարդիկ ասում են՝ իշխանությունը պետք է րոպե առաջ հրաժարական տա։ Գոնե ասեն՝ այս դեպքերն անցնի, բայց չէ՝ հիմա, որ եթե հանկարծ պարզվի վիճակի ինչ-որ կառավարում կա, կասեցման հնարավորություն, դա էլ չլինի։ Սա հինգերորդ շարասյան գործելակերպ է։ Մեր հատուկ ծառայությունները պետք է այս ամեն ինչին ուշադրություն դարձնեն։ Այս խնդիրը պետք է մտածենք՝ ինչպես լուծենք առանց մեր ժողովրդավարությանը վնասելու»,- ասաց Փաշինյանը։
Փաշինյանը չբացառեց, որ Զինված ուժերում հնարավոր է լինեն բարձրաստիճան պաշտոնյաներ, որոնք իրականում աշխատում են օտար երկրների համար որպես լրտեսներ։
«Երկու օր առաջ մի ռեպորտաժ էի դիտում, ասվում էր, որ ադրբեջաանական կողմը գրավել է բարձունք, հայկական կողմը հակագրոհել է եւ հետ գրավել, մեղադրվող բարձրաստիճան զինվորականը, իր լիազորությունները զանցառելով, ասել է՝ հետ իջեք գրաված բարձունքից։ Սա չէ խնդիրը։ Խնդիրն այն է, որ չկա բացատարություն՝ ինչո՞ւ։ Նման իրավիճակներ շատ են եղել։ Օրինակ՝ բարձրաստիճան զինվորականը զորքի մեջ խուճապ է տարածում եւ հանձնարարում է իր ենթակային՝ գնա խուճապ տարածի, որ բոլորը գնան դիրքերից։ Կամ պայմաններ է ապահովում, որ հակառակորդն առանց որեւէ բարդության գրավի տարածքներ։ Ինչո՞ւ ես արել։ Որեւէ հանցագործություն բացահայտված չէ քանի դեռ մոտիվացիան բացահայտված չէ։ Իմ կարծիքով՝ գուցե կարող է ուրիշ երկրի հավաքագրված գործակալներ են։ Ինքը պետք է վերեւից հրաման ստացած լինի, ես պետք է հրամանը տված լինեմ, չեմ տվել, ուրեմն՝ ինքն ուրիշ վերեւ ունի, ստացել է, արել է։ Ինքը չի ասում, թե ումից է հրամանը ստացել, որովհետեւ առավել լուրջ մեղադրանք կստանար՝ պետական դավաճանություն, ասում է՝ մեղավոր եմ, ինձ անփութության համար դատեք։ Հակառակ պարագայում ինքը իր ապրած ամբողջ կյանքը կպարզվի՝ զրո արժեք ունի, որովհետեւ ինքը գործակալ է։ Մենք, ցավոք, սա տեսնելու ենք»,- նշեցը Փաշինյանը։
