Կանադական պատմական նամականիշների հավաքածուն եւ Լաոսից հազվագյուտ նամականիշների հավաքածուն թագավորական ընտանիքին են հանձնվել որպես պետական նվերներ, սակայն դարձել են միապետության մասնավոր հավաքածուի սեփականությունը, որը գնահատվում է 100 մլն ֆունտ սթեռլինգ, գրում է The Guardian-ը:

Ինչպես նշում է պարբերականը, թագավորական ընտանիքը յուրացրել է նամականիշների երկու հավաքածու, որոնք պետական պաշտոնական նվերներ են եղել: Դրանք ներառվել են մասնավոր ֆիլատելիստական հավաքածուի մեջ (RPC), որը Չարլզ III-ը ժառանգել է իր մորից՝ Եղիսաբեթ II-ից։  

Կանադական նամականիշները նվիրաբերվել են Կանադայի կառավարության կողմից 1939 թվականին, այսինքն՝ նախքան 1990-ականներին օրենքի ընդունումը, որով թագավորական ընտանիքի պաշտոնական նվերները չեն կարող դառնալ նրանց անձնական ունեցվածքի մի մասը: Լաոսից նամականիշների հավաքածուն 2016 թվականին Եղիսաբեթ Երկրորդ թագուհու 90-ամյակի պաշտոնական նվերն էր:  

Թագավորի նամականիշների հավաքածուն բաղկացած է 328 ալբոմներից, որոնք հավաքել է Գեորգ V-ը, եւ եւս 30 ալբոմներից, որոնք հավաքել է Գեորգ VI-ը, ինչպես նաեւ Եղիսաբեթ Երկրորդի հավաքածուից։