Արհեստական բանականության հետ կապված մտավախություն կա, որ ղրղըզները կարող են մնալ առանց աշխատանքի, ասել է երկրի վարչապետ Ակիլբեկ Ժապարովը, տեղեկացրել է ORDA-ն։

Ղրղըզստանում տեղեկատվական տեխնոլոգիաների համաժողովում Ակիլբեկ Ժապարովը պատմել է մի պատմություն, որը պատահել է իր հետ Մոսկվայում։

«Ինձ մոտեցավ մի մեքենա՝ առանց վարորդի եւ տարավ իմ ուզած տեղը։ Հինգ րոպեանոց ուղեւորության ժամանակ իմ անվտանգությունն արհեստական բանականության ձեռքում էր։ Փորձը բավական անսովոր էր։ Ավելի շուտ՝ նախորդ ուղեւորները տպավորված էին տեխնոլոգիական հրաշքով։ Դա իսկապես հրաշք էր, բայց ինձ ավելի շատ անհանգստացրեց հնարավոր հետեւանքը, որ մոտ ապագայում Մոսկվան կլցվի անվարորդ տաքսիներով, ինչը կարող է հանգեցնել աշխատատեղերի կորստի մեր շատ միգրանտների համար։ Սա անխուսափելի մարտահրավեր է մեզ համար»,- ասել է Ակիլբեկ Ժապարովը։

Ի դեպ, քաղաքական գործչի կարծիքով՝ «արհեստական բանականությունը յուրաքանչյուրին այնպիսի հմտություն է տալիս, որն ունենալ երբեւէ չենք մտածել։ Նա անդրադարձավ ԶԼՄ-ներին, որտեղ, նրա կարծիքով, մարդուն կարելի է փոխարինել արհեստական բանականությամբ։

«Օրինակ, Մամուլի բրիտանական ասոցիացիան օգտագործել է արհեստական բանականությունը ամիսը մոտ 30 հազար լուր գրելու համար։ Ակնկալվում է, որ առաջիկա տարիներին նորությունների, հրապարակումների, հոդվածների եւ վերլուծությունների 90 տոկոսը կարվի արհեստական բանականության օգտագործմամբ, այլ ոչ թե լրագրողների ու գրողների միջոցով»,- ասել է նա։

Նրա խոսքով՝ շուտով անգրագետ կարելի է անվանել այն մարդուն, որը չի կարողանա փոխգործակցել արհեստական բանականության տեխնոլոգիաների հետ։