Բաքուն եւ Երեւանը ԱՄՆ-ում անցած շաբաթ տեղի ուենցած բանակցություններում առաջընթաց քայլ են կատարել, սակայն բանակցային գործընթացին հարկավոր է իրատեսորեն մոտենալ, ասել է Ադրբեջանի արտաքին գործերի նախարար Ջեյհուն Բայրամովը։
«(Մայիսի 1-4-ին) տեղի են ունեցել խաղաղության համաձայնագրի բավական ինտենսիվ քննարկումներ, որոնք ընդգրկում էին մի շարք կետեր եւ կարեւոր պահեր։ Չի կարելի ասել, թե լիովին պայմանավորվել ենք։ Կողմերի դիրքորոշումների միջեւ բավական շատ տարաձայնություններ կան, բայց այս բանակցություններում ձեռք են բերվել պայմանավորվածություններ խաղաղության համաձայնագրի առանձին կետերի վերաբերյալ։ Մենք եւս մեկ առաջընթաց քայլ ենք կատարել»,- չորեքշաբթի ասել է Բայրամովը լրագրողներին։
Նախարարը միեւնույն ժամանակ նշել է, որ «մենք պետք է իրատեսորեն վերաբերվենք այդ գործընթացին»՝ ավելացնելով, որ Բաքուն կողմնակից է խաղաղ գործընթացին։
Բայրամովն ասել է, որ Բաքվում դրական են գնահատում մայիսի 14-ին Ադրբեջանի եւ Հայաստանի ղեկավարների Բրյուսելում կայանալիք հանդիպումը՝ նշելով, որ «այն պետք է դիտարկել որպես Բաքվի եւ Երեւանի բանակցությունների բաղկացուցիչ մաս, որոնք իրականացվում են հարաբերությունների կարգավորման նպատակով»։