Երեւանի փոխքաղաքապետ Տիգրան Ավինյանը այսօր՝ մայիսի 11-ին, լրագրողների հետ զրույցում բացառեց, որ «Նեմեսիսի» հուշարձանը քաղաքապետարանի որոշմամբ հնարավոր է ապամոնտաժվի։
«Այդ արձանը նվիրված է ազգային արժանապատվության ասպետներին։ Այն որեւէ ժողովրդի, որեւէ երկրի դեմ չէ։ Շատ քաղաքականացնել հարցը, ինչն անում է Թուրքիայի արտգործնախարարությունը, տեղին չէ, որովհետեւ եթե անընդհատ նույն թեմաները քննարկենք, կարող ենք հասնել Ծիծեռնակաբերդի հուշահամալիրին, դա էլ կարող է հարց առաջացնել թուրք պաշտոնյանների մոտ։ Սա մեր ներքին հարցն է, որեւէ մեկը չի կարող դրա հետ կապ ունենալ»,- ասաց Ավինյանը։
Նրա խոսքով՝ արձանի տեղադրման որոշումն ընդունվել է Երեւանի ավագանու կողմից 2021 թվականին։ Կառավարությունը որեւէ կապ չի ունեցել։
«Երեւանի քաղաքապետարանն այդ որոշումը 2021 թվականին չի համաձայնեցրել։ Կարծում եմ, որ նմանատիպ որոշումները պետք է քննարկվեն Կառավարության եւ Արտաքին գործերի նախարարության հետ, վստահաբար այդտեղ սխալ բան կա։ Արձանի տեղադրումից առաջ մենք Թուրքիայի արձագանքի վերաբերյալ որեւէ քննարկում, մտահոգություն չենք ունեցել»,- նշեց Ավինյանը։
Ավինյանն ասաց, որ թեմայի շուրջ Փաշինյանի հետ եւս խոսակցություն չի ունեցել։
Հիշեցնենք, որ Թուրքիան առանց նախօրոք տեղեկացնելու ապրիլի 29-ին չեղարկել էր Flyone Armenia ավիաընկերությանն ավելի վաղ տրամադրված թույլտվությունը Թուրքիայի օդային տարածքով դեպի Եվրոպա չվերթեր իրականացնելու համար։ Դրա հետեւանքով Փարիզ-Երեւան օդանավը հարկադրված վայրէջք էր կատարել Քիշնեւի օդանավակայանում։ Մայիսի 2-ին էլ թուրքական արգելքի պատճառով չեղարկվել էր Երեւան-Փարիզ-Երեւան չվերթը։
Թուրքիայի արտգործնախարար Մեւլութ Չավուշօղլուն օդային տարածքի փակումը բացատրել է Երեւանում «Նեմեսիս»գործողության հերոսների հուշարձանի բացմամբ։
«Մենք ինքնաթիռները մեր երկիր կթողնենք անհրաժեշտության դեպքում, բայց օդանավերի եւ մասնավոր ջեթերի թռիչքը մեր երկրի օդային տարածքով թույլ չենք տա, քանի դեռ շարունակվում են սադրանքները [Հայաստանի կողմից Թուրքիայի եւ Ադրբեջանի դեմ]։ Եթե նրանք չդադարեցնեն դրանք, ապա մենք այլ միջոցների կդիմենք»,- ասել է նա։
Հայոց ցեղասպանությունն իրականացրած թուրք պարագլուխների սպանությունները կազմակերպած «Նեմեսիս» գործողության անդամներին նվիրված աղբյուր-հուշակոթողը բացվել է ապրիլի 25-ին, Երեւանի սրտում՝ Օղակաձեւ զբոսայգու չորրորդ հատվածում։
Թուրքիան շարունակում է իր օդային տարածքը փակ պահել հայկական օդանավերի համար
