Կենդանիների իրավունքների պաշտպանության ակտիվիստները կիրակի հավաքվել են Մադրիդում, որպեսզի բողոք հայտնեն Իսպանիայում ութոտնուկների բազմացման ֆերմայի շինարարության ծրագրի դեմ՝ հայտարարելով, որ երկրում և Եվրոպական միությունում անազատության մեջ կենդանիների բարեկեցությունը երաշխավորող օրենքներ չկան, տեղեկացնում է The Associated Press-ը։
Ենթադրյալ ֆերման, որի նպատակը անազատության մեջ ութոտնուկների խոշորամասշտաբ բազմացումն է, նախատեսվում է կառուցել հաջորդ տարի Կանարյան կղզիներում։
Մի քանի տասնյակ մարդ էր եկել իր անհանգստությունն արտահայտելու նախագծի առիթով, որով նախատեսվում է 3 մլն ութոտնուկ պահել ջրավազաններում, չնայած որ այս էակները միայնակ գիշատիչներ են իրենց բնական միջավայրում։
Անազատության մեջ բուծվող ութոտնուկներն իրենց այլ կերպ կպահեն, քան վայրի բնության մեջ, հայտարարել է այս նախագիծն առաջ տանող, ծովամթերքների արտադրության Nova Pescanova ընկերությունը։
«Եվրոպական միությունում հնարավոր չէ կենդանիների ինչ-որ տեսակներ բուծել առանց նրանց պահման պայմաններին հետևելու։ Սա ստանդարտ է, և մեր մեր խումբը ոչինչ չի անում, բացի այն, որ հետևում է ղեկավարող սկզբունքներին և օրենսդրությանը»,- ասել է ընկերության ջրային մշակույթի գծով տնօրեն Ռոբերտո Ռոմերոն։
Քանի որ ութոտնուկների օգտագործման պահանջարկն աճում է, ուստի դրանց բազմացումը դիտարկվում է որպես առաջին քայլ սննդամթերքի կայուն արտադրության ապահովման գործում։
Ութոտնուկը միջերկյածովյան սննդակարգի հիմնական մթերքն է, սննդակարգ, որ խիստ տարածված է Իսպանիայում և Իտալիայում, թեև երկու երկրներն էլ ներկրում են իրենց օգտագործած ութոտնուկների մեծ մասը։ Վերջին ժամանակներս այս դելիկատեսի համաշխարհային պահանջարկը մեծացել է․ ՄԱԿ-ի Մթերային և գյուղատնտեսական կազմակերպության տվյալներով, 2016-ից 2018 թվականների ընթացքում ութոտնուկների ներկրումն ԱՄՆ-ում ավելացել է 23%-ով, իսկ Չինաստանում 73%-ով։