Չնայած դա չի արդարացնում Ռուսաստանի ներխուժումն Ուկրաինա, իրադարձությունների շարքը, որոնք հանգեցրին պատերազմի, սկսվել է ՆԱՏՕ-ի անդամների՝ Ուկրաինային դաշինքում ընդունելու հնարավորության առաջին քննարկումից հետո, հայտարարել է ԱՄՆ նախկին պետքարտուղար Հենրի Քիսինջերը Die Zeit շաբաթաթերթին տված հարցազրույցում, որը հրապարակվել է հինգշաբթի։
«Ես չեմ կարծում, որ ամբողջ մեղքը Պուտինինն է։ Պատերազմն ինքնին շատ անողոք է, հարձակումը պետք է հետ մղվի, եւ ես աջակցում եմ ուկրաինական եւ արեւմտյան դիմադրությանը։ Բայց դեռ 2014-ին էսսեում ես լուրջ կասկածներ հայտնեցի Ուկրաինային ՆԱՏՕ-ին միանալու հրավերի ծրագրի վերաբերյալ։ Դրանով սկսվեց իրադարձությունների շարքը, որոնք ավարտվեցին պատերազմով։ Դա չի արդարացնում պատերազմը, բայց ես այն ժամանակ եւ մինչ օրս կարծում եմ, որ խելամիտ չի լինի համատեղել Արեւելյան դաշինքի բոլոր նախկին երկրների անդամակցությունը ՆԱՏՕ-ին եւ Ուկրաինային ՆԱՏՕ հրավիրելու հետ»,-ասել է Քիսինջերը՝ հիշեցնելով, որ այն ժամանակ առաջարկում էր չեզոք կարգավիճակ տալ Ուկրաինային՝ նրան «կամուրջ դարձնելով երկու կողմերի միջեւ»։
Այժմ նախկին պետքարտուղարը համոզված է, որ Ուկրաինային անհրաժեշտ է ընդունել Հյուսիսատլանտյան դաշինք պատերազմի ավարտից հետո։ «Հիմա, երբ ՆԱՏՕ-ի եւ Ռուսաստանի միջեւ այլեւս չկան չեզոք գոտիներ, Արեւմուտքն ավելի լավ է Ուկրաինային ընդունի ՆԱՏՕ։ Դա երաշխավորում է, որ հակամարտությունները, որոնք կարող են նորից ծագել պատերազմի ավարտից հետո կամ խաղաղության համաձայնագրի արդյունքում, չեն կարող լուծվել Ռուսաստանի կամ Ուկրաինայի միակողմանի հարձակումներով»,-բացատրել է Քիսինջերը։