ԱՄՆ նախագահ Ջո Բայդենը և Ներկայացուցիչների պալատի խոսնակ Քևին ՄաքՔարթին շաբաթ ուշ երեկոյան «սկզբունքային համաձայնություն» են ձեռք բերել՝ բարձրացնելու պետական պարտքի օրենքով սահմանված առավելագույն շեմը՝ ձգտելով գործարք կնքել դաշնային ծախսերը սահմանափակելու և ԱՄՆ-ի հնարավոր աղետալի դեֆոլտը կանխելու համար, հաղորդում է Associated Press-ը:
Այնուամենայնիվ, համաձայնագիրը կարող է զայրացնել ինչպես դեմոկրատական, այնպես էլ հանրապետական կողմերին։ Բանակցողները համաձայնել են հանրապետականների որոշ պահանջներին՝ ավելացնելու սննդամթերքի կտրոն ստացողների աշխատանքի պահանջները, ինչն առաջացրել է Ներկայացուցիչների պալատի դեմոկրատների դժգոհությունը:
Հաջորդ շաբաթ Կոնգրեսի հավանությունն ստանալու համար կպահանջվի երկու կուսակցությունների աջակցություն:
Դեմոկրատ նախագահը և հանրապետական խոսնակը համաձայնության են եկել այն բանից հետո, երբ նրանք հեռախոսով զրուցել են շաբաթ երեկոյան:
«Համաձայնագիրը փոխզիջում է, որը նշանակում է, որ ոչ բոլորն են ստանում այն, ինչ ուզում են», - ասել է Բայդենը շաբաթ ուշ երեկոյան հայտարարության մեջ: «Դա ղեկավարության պարտականությունն է»,- ասաց նա։
Բայդենը համաձայնագիրն անվանել է «լավ նորություն ամերիկացիների համար, քանի որ այն կանխում է աղետալի դեֆոլտը, որը կարող է հանգեցնել տնտեսական անկման, կենսաթոշակային հաշիվների դատարկման և միլիոնավոր աշխատատեղերի կորստի»:
ՄաքՔարթին Կապիտոլիումում ունեցած հակիրճ ելույթում ասել է, որ «դեռ շատ աշխատանք կա անելու», միաժամանակ հավելելով, որ «սա սկզբունքորեն ամերիկյան ժողովրդին արժանի համաձայնություն է»։
Ըստ համաձայնագրի՝ օրենսդրական փաթեթը կարող է պատրաստվել և ժամանակին ներկայացվել Ներկայացուցիչների պալատ՝ քվեարկության համար, արդեն չորեքշաբթի, իսկ հետո կներկայացվի Սենատին:
Փաթեթի առանցքը երկամյա բյուջետային գործարքն է, որը 2024 թվականին ծախսերը կպահպանի և 2025 թվականին այն կավելացնի 1 տոկոսով՝ պարտքի սահմանաչափի երկու տարով ավելացման դիմաց:
Գործարքը կնքվել է այն բանից հետո, երբ ֆինանսների նախարար Ջանեթ Յելենը Կոնգրեսին ասել է, որ ԱՄՆ-ը կարող է չկատարել իր պարտքային պարտավորությունները մինչև հունիսի 5-ը` չորս օր ուշ, քան նախկինում ենթադրվում էր, եթե օրենսդիրները ժամանակին միջոցներ չձեռնարկեն դաշնային պարտքի վերին շեմը բարձրացնելու համար:
