Ոստիկանները ՀՅԴ բյուրոյի նախկին ներկայացուցիչ Հրանտ Մարգարյանին եւս թույլ չտվեցին բարձրանալ Սարդարապատի հուշահամալիր: Այն առավոտից փակ էր բոլորի համար քանի որ նախատեսված էր վարչապետ Նիկոլ Փաշինյանի եւ հանրապետության ղեկավար կազմի մասնակցությամբ հանդիսավոր արարողություն:
Հրանտ Մարգարյանը NEWS.am-ի հետ զրույցում նշեց. «Ես իսկապես չգիտեմ՝ սա ինչ տեսակ վերաբերմունք է: Ես հասկանում եմ, որ իրենք շատ են վախենում, բայց կարծում եմ՝ անտեղի են վախենում առնվազն էս օրվա հետ կապված: Ուղղակի ապշեցուցիչ է:
Պետք է նախորոք հայտարարեն, ես միշտ եկել եմ մինչեւ կեսօր բարձրացել եմ Սարդարապատ եւ վերադարձել եմ, նման բան չեմ տեսել: Եթե անգամ մեքենաների հոսքն արգելված է եղել, մարդկանց հոսքն արգելված չի եղել»:
Անդրադառնալով օրվա խորհրին, ՀՅԴ-ական գործիչն ասաց. «Սա յուրահատուկ օր է, մենք 9 դար հայկական բարձրավանդակի վրա պետականություն չենք ունեցել, 9 դար հետո մեր ամենավատ պահին, ջարդից, կոտորածից հետո կարողացել ենք պետականություն ստեղծել: Ինչո՞ւ ենք կարողացել. Երկու պատճառ է եղել: Նախ, մենք ինքնրուրույն ենք եղել, ինքնուրույն քաղաքական ազգային ուժ ենք եղել, եւ մենք կազմակերպված մարտական, զինվորական ուժ ենք եղել: Դրա համար կարողացել ենք անկման ամենավատ աստիճանից հառնել եւ պետականություն ստեղծել:
Այսօր եւս մենք պետք է մտածենք նույնիսկ այս պարտությունից հետո երկու բան կա, որ մեզ կարող է փրկել՝ ինքնուրույնություն, անկախություն եւ զինվորական ուժ ու կազմակերպվածություն: Այդպես պետք է կարողանանք փրկվել:
Այս իշխանությունը ճիշտ հակառակն է անում, մենք մեր հույսը դրել ենք օտարի վրա, դռնեդուռ ենք ընկել, որպեսզի մեր հարցերը ուրիշների միջոցով լուծենք, մենք չենք փորձում մեր սեփական ուժը վերակերտել: մենք չենք փորձում ազգային միասնականություն ստեղծել, որովհետեւ ազգային ուղղությամբ չենք գնում»:
