Հաջորդ տարվանից Սոմալին իր նախագահին և մյուս պաշտոնյաներին կընտրի ուղիղ քվեարկությամբ, կիրակի հայտարարել է կառավարությունը՝ վերջ դնելով երկրում գործող անուղղակի քվեարկության համակարգին, տեղեկացնում է Reuters-ը։
Համատարած անկայունության պայմաններում, ինչը իսլամական ապստամբության և պետական թույլ կառույցների հետևանք է, վերջին տարիներին օրենսդիրներն էին քվեարկում նախագահի օգտին, այն դեպքում, երբ կլանների ղեկավարները և ավագանիներն էին ընտրում օրենսդիրներին ինչպես դաշնային կառավարությունում, այնպես էլ տարածաշրջանային նահանգներում։
Նախապես ծրագրվում էր, որ երկիրը համընդհանուր ընտրական իրավունքին կվերադառնա 2020 թվականին, սակայն քաղաքական գործիչների շարունակվող խմբակայնությունը և ամբողջ երկրում պահպանվող անկայուն վիճակը հարկադրեցին կառավարությանը պահպանել անուղղակի քվեարկությունը։
«Հաջորդ տարվանից սկսած յուրաքանչյուր հինգ տարին մեկ կանցկացվեն ընտրություններ «մեկ մարդ՝ մեկ ձայն» սկզբունքով»,- ասվում է հայտարարության մեջ, որ Թվիթերում հրապարակել է երկրի պետական SONNA ԶԼՄ-ն։
Վարչապետի պաշտոնը վերացվելու է։
«Վարչապետի պաշտոնը վերացվելու է և փոխարինվելու է նախագահական համակարգով, որի դեպքում նախագահը և փոխնախագահը ընտրվելու են անմիջականորեն ժողովրդի կողմից միասնական ցուցակով»,- նշվում է հայտարարության մեջ։
Որոշումն ընդունվել է մայրաքաղաք Մոգադիշոյում նախագահ Հասան Շեյխ Մոհամուդի նախագահությամբ կայացած քառօրյա հանդիպման արդյունքում։
Հայտարարության համաձայն, միայն երկու քաղաքական կուսակցության է թույլատրվելու մասնակցել ընտրություններին։
Մոհամուդը, որը հնգամյա մանդատ ունի, օրենսդիրների կողմից ընտրվել է անցյալ տարվա մայիսին։